Astanada ótken búrkitshilerdiń xalyqaralyq týrnırinde mańǵystaýlyq qusbegi Aıshýaq Taımanov jeńimpaz atandy.

20-21 qazan kúnderi Astana qalasy Alash tas jolynyń boıynda Kúntýǵan Toqtybaıuly atyndaǵy Halyqaralyq qusbegiler jarysy ótti. Eki kúnge sozylǵan jarysqa Mońǵolıa, Qyrǵyzstan, Qazaqstannan otyzǵa jýyq qyran men elimizdiń on oblysynan qusbegiler qatysty. Qyran qustar saıysynyń nátıjesi boıynsha Jambyl oblysy I oryn, Atyraý oblysy II oryn, Mańǵystaý oblysy III oryn aldy. Kishi qustardan, ıaǵnı ıtelgi saıysynan I oryndy Mańǵystaý oblysy, II oryndy Astana qalasy, III oryndy Atyraý oblysy ıemdendi.

«Itelgim áli balapan. Esimi – Jebe. Daıyndaǵanyma 3-4 aı boldy. Itelgimdi áli dala ańyna salyp kórgenim joq. Balapan bolǵandyqtan, tek osy saıys erejesi boıynsha daıyndadym. Negizgi súıikti isim – qusbegilik. Itelgimdi tek jarysqa daıyndaǵan bolatynmyn. Al ańǵa aldymyzda kele jatqan qansonarda salamyn», — dedi mańǵystaýlyq jeńimpaz Aıshýaq Taımanov.

Taımanov Aıshýaq, búrkitshi, 1988 jyly Tushshybek aýylynda dúnıege kelgen. Bos ýaqytynda qus ushyryp, qaqpan qurýmen, saıatshylyqpen aınalysady.

Qusbegi aýylda baýyrlaryna erip, solardan kórip qusqa degen qyzyǵýshylyǵy oıanǵanyn aıtady. Bala kezinen úlken ákesi men óz ákesine erip qaqpan quryp ósken. Al qusbegilik shańyraǵynda múldem bolmaǵan deıdi.

«Jarysqa búrkit pen ıtelgimdi apardym. Itelgi — kishi qus. Alatyn ańynyń eń irisi - qoıan, úırek sekildi ańdar. Al búrkit babyna kelse, qasqyrǵa deıin alady. Eń qıyny — búrkitti baptaý. Ony ańǵa salý úshin 40-45 kún arytady. Eń birinshi orynda búrkittiń ish-qurylysynyń tazalyǵy. Eger qyrannyń asqazanynda maı bolsa, qus salǵan ańyna aınyp, barmaı qalady. Sonyń barlyǵyn qadaǵalap otyrý qajet. Qusty baptaǵanda boz jem, aq jem, sary bórtpe berip baptaımyz», — deıdi qusbegi Aıshýaq Taımanov.