Bul jóninde qoǵamdyq densaýlyq saqtaý qyzmeti bóliminiń basshysy Ǵalym Altýraev málimdedi. Mańǵystaý oblysy 2018 jyldyń 1 sáýirinen bastap medısınalyq qujattamany qaǵazsyz júrgizý boıynsha pılottyq jobaǵa endi. 2017 jyly Medısınalyq aqparattyq júıe 4 densaýlyq saqtaý uıymynda bolsa, búginde 34 uıymǵa (29 – memlekettik, 5 – jeke menshik) engizilgen.

Mańǵystaý oblysynda 89 medısınalyq nysannyń barlyǵy 100 paıyz ınternet jelisimen qamtylǵan. 2612 jumys orny 98 paıyzǵa kompúterlik tehnıkamen jabdyqtalǵan. 5911 medısınalyq qyzmetker mınıstrlik portaldaryn paıdalanady.

— Oblysta 20-60 jas aralyǵyndaǵy 345 myń ınternetbelsendi halyq bar. Olardyń 116 357-si «DamuMed» mobıldi qosymshasyn paıdalanýshylar. Sonymen qatar oblystaǵy barlyq medısınalyq uıymdarǵa tirkelgen halyq sany 676 109 bolsa, onyń 636 016-synyń elektrondy densaýlyq kýálikteri toltyrylǵan. MAJ-de 1 709 840 adam medısınalyq qyzmet alǵan, — deıdi Ǵalym Bısenbaıuly.

«DamuMed» mobıldi qosymshasy arqyly eńbekke jaramsyzdyq paraqtary men laboratorıalyq zertteýlerdiń nátıjelerin alýǵa bolady. Sondaı-aq dárigerdi úıge shaqyrý qyzmeti, dárigerge onlaın jazylý múmkindigi qarastyrylǵan. Tekseristen ótýińiz qajettigi jóninde (prafılaktıka, skrınıng, flúorografıa t.b.) eskertpe kelip turady. Qosymshanyń «Meniń densaýlyǵym» bólimi tirkeýde turǵan júkti áıelderge qyzmet etedi. Medısınalyq júıe qoldanysqa engizilgennen bastap 49 347 dárigerdi úıge shaqyrý qyzmeti oryndalǵan. Onyń 21 myńnan astamy mobıldi qosymsha arqyly júrgizilgen.