Mańǵystaý oblysy ákimi Eraly Toǵjanovtyń qatysýymen ótken aparattyq jıynda "Jumyspen nátıjeli qamtý jáne jappaı kásipkerlikti damytýdyń 2017-2021 jyldarǵa arnalǵan" eńbek baǵdarlamasyn iske asyrýdyń aldyn ala qorytyndylary qaraldy.
2017 jyldyń naýryz aıynda bastalǵan baǵdarlama jumyssyz jáne ózin-ózi jumyspen qamtyp otyrǵan halyqty jappaı oqytý, kásipkerlik negizderine oqytý jáne jeńildetilgen shaǵyn kredıt berý arqyly kásipkerlik bastamalardy qoldaýǵa, eńbek utqyrlyǵyn arttyrýǵa baǵyttalǵan. Bıyl baǵdarlamany iske asyrýǵa 2,8 mlrd.teńge qarastyrylǵan.
"Baǵdarlamaǵa sáıkes 1131 adamdy 15 uıymda oqytý kózdelip otyr. Olar, eń aldymen, UBT tapsyrmaǵan jáne oqý oryndaryna túspegen mektep túlekteri. Stýdentter tegin oqıdy, sonymen qatar shákirtaqy tólenip, kúnine bir ret ystyq tamaq beriledi. Basqa qalalardan kelgenderge jol júrý jáne turý shyǵyndaryna materıaldyq kómek berý kózdelgen. Sondaı-aq kolejde jáne oqý ortalyqtarynda 712 adam qysqa merzimdi kýrs oqydy. Oqý merzimi eńbek naryǵynda suranysqa ıe mamandyqtar boıynsha 1 aıdan 6 aıǵa deıin. Oqýdan keıin 187 adam jumysqa ornalastyryldy»,- dedi Mańǵystaý oblysynyń jumyspen qamtýdy úılestirý jáne áleýmettik baǵdarlamalar basqarmasynyń basshysy Qýanysh Berishbaev.
Al «Atameken» UKP Mańǵystaý oblysy boıynsha basshysy Nurbek Qarasaevtyń aıtýynsha, "Bastaý Bıznes" baǵdarlamasy boıynsha 880 adam oqytylǵan. Sondaı-aq jalpy somasy 605,2 mln.teńgeni quraıtyn 192 joba júzege asyrylǵan.
