Chıchıbýdyń Takahashıno taýynyń baýraıynda dáýleti jurttan asqan baı bolypty. Saraıynyń aınalasyndaǵy myń úı oǵan qyzmet etipti. Baı kóktemde paporotnık kestirmek bop, bylaı dep buıyrady:  Myń úıdiń búkil adamy bir kún ishinde Takashıno taýyndaǵy paporotnıktiń birin qaldyrmaı otap, meniń saraıymnyń mańyndaǵy qoralarǵa jınasyn.

Myń úıdiń bala-shaǵasynan bastap qarıasyna deıin Takahashıno taýyna qaptaıdy. Baı taýdyń tóbesinde turyp, jurtqa ámir berip tur:

— Túgin qaldyrmaı kesińder, birde-bir paporotnık qalmasyn.

Kún batqansha baıdyń buıryǵyn oryndaý múmkin emes edi. Taýdyń bir betkeıiniń ǵana paporotnıgi kesilgende Kún batysqa qaraı aýdy. Baı batyp bara jatqan Kúnge pańdana qarady. «Áı, Kún! Sharýa bitpeı jatyp, nege batasyń? Meniń batqan Kúndi qaıta shyǵarar qudiretim bar».

Baı jelpýishin jelpip «Eı, Kún qaıt keıin!» dep aıǵaılady. Baıdyń daýsy búkil taýdy jańǵyryqtyrdy. Osy sátte batyp bara jatqan Kún Aspanǵa qaıta kóterildi de, aınala jap-jaryq boldy. Jurttyń tańdanysynda shek joq.

— Meniń qudiretime eshkim teń kelmeıdi. Qane, paporotnıkti túgel otap bitirińder.

Jurt japa-tarmaǵaı otalǵan paporotnıkti jınaýǵa kiristi. Kún sáýlesi túskende taýdy jalyn sharpyp ótkendeı boldy.

— Paporotnıkti qoraǵa  tasyńdar, qane jyldam!

 Aǵash arqalaǵan jurt baıdyń saraıyna bara jatty. Qora paporotnıkke tolǵanda Kún de batty. Taý tóbesindegi baı asqaqtana bılep júr. Aspan qyp-qyzyl. Jurt demin ishine tarty. Kóktemde kórinbeıtin qyzyl shegirtke Takashıno taýyna josyp barady. Myńdaǵan qyzyl shegirtke...

Kenet qoradaǵy paporotnıkter aspanǵa usha bastady. Kún uıasyna kirgende taý basynda qutyra bılegen baı da ǵaıyp boldy. Qoralardan ushqan paporotnıkter taýǵa qaıta tigildi. Takashıno taýy paportnık taýy retinde belgili bop, Chıchıbýdyń halqyn búginde asyraýda.

Kóktemde Takashıno taýy qyzyl araıǵa boıalǵanda taýdyń tóbesinen ókirgen baıdyń daýsy estiledi desedi.

Japon tilinen aýdarǵan Sharafat Jylqybaeva