Kaspi Bank-tiń baspasóz hatshysy Erbol Azanbek óziniń Facebook paraqshasynda kredıt pen Kaspi Gold kartasyn rásimdeýdi, depozıt ashýdy endi onlaın júzege asyrýǵa bolatynyn habarlady.
«Bank bólimshesine barýdyń keregi joq. Kredıtti onlaın rásimdegen soń, arnaıy kodpen bankomattan baryp ala beresiz. Kod bolmasa bankomat betińizdi skanerlep, siz ekenińizge kóz jetkizgen soń, qarajatty beredi», - dep jazdy Erbol Azanbek.
Aıta keteıik, buryn Kaspi.kz arqyly qarajatty karta, telefon nómiri arqyly aýdarylsa, endi QR kod arqyly aýdarýǵa bolady.
«Dúkenderde endi QR kod arqyly tólem jasaýǵa bolady. Mysaly: teledıdar alǵyńyz keldi. Dúkende teledıdardyń janynda QR kod turady. Siz kodty Kaspi.kz arqyly skanerlep, tólem jasaı beresiz. Kartanyń keregi joq. Telefon, Kaspi.kz qosymshasy bolsa jetkilikti», - dep túsindirip ótti Erbol Azanbek.
Ksápierler QR kod arqyly tólem qabyldaı alatyn boldy. Sebebi bıznes úshin Kaspi Business qosymshasy iske qosyldy. Buryn Kaspi.kz arqyly jeke tulǵalar aýdarym, tólem sıaqty qyzmetti jasasa, endi Kaspi Business bıznes úshin týra sondaı qyzmetterdi usynady.
Salyq, áleýmettik tólem, jalaqyny onlaın aýdarý, shotty onlaın basqarý, shottan onlaın qarjy aýdarý t.b qyzmetter bar. Kaspi Business kartasy iske qosyldy. Kaspi Gold-yń bızneske arnalǵan túri. Sharttary, qyzmeti týra Kaspi Gold-taǵydaı.
Erbol Azanbek Kaspi.kz-tegi habarlama qyzmeti habarlama 2.0-ge aýysqanyn da habarlady.
«Buryn tólengen qyzmet, alynǵan qarajat boıynsha qosymshaǵa habarlama keletin. Endi sol habarlamaǵa mátin, smaılıkpen jaýap berýge bolady.
Komýnaldyq tólem týraly habarlama kelse, birden sol jerden jaýap retinde tólem jasaı alasyz.
Sosyn, bizdiń bankomattarymyz "aqyldy" bankomattarǵa aýysýda. Qazir depozıtten nemese onlaın rásimdegen aqshańyzdy alǵyńyz kelse, bankomat bet-álpetińizdi skanerlep, sizben atyńyzdy aıtyp, amandasyp, suraǵan qarajatyńyzdy beredi. Búgin tanystyrylymda Mıhaıl bankomatqa bas kıim, kózildirik kıip jaqyndap edi, "keshirińiz, bas kıim, kózildirigińizdi sheshińiz", dep sheshkizip, sosyn qolyna Kazpravdany ustaýdy surady. Sosyn baryp, tanyǵanyn aıtyp, suraǵan aqshasyn berdi)
Buryn bonýstardy tek ishki tólemder úshin tóleýge bolatyn. Endi bonýstar arqyly dúkenderde tólem jasaýǵa bolady.
Taǵy bir jańalyq, Forbes iri jańalyq dep baǵalap úlgerdi - Kaspi kelesi jyly London Qor bırjasynda İRO-ǵa shyǵady» dep jazdy Erbol Azanbek.
