Gennadıı Golovkınniń promoýteri Tom Leffler GGG men meksıkalyq boksshy Saýl Alvares arasyndaǵy úshinshi jekpe-jektiń 2019 jyldyń jeltoqsan aıynda ǵana ótýi múmkin ekenin aıtty. Bul týraly Qamshy.kz aqparat agenttigi fightnews.info portalynyń deregin negizge alyp habarlaıdy.
Tom Leffer ázirge jekpe-jekti tikeleı efırde taratatyn telekompanıamen kelisimge kelmegenin aıtty.
"Eń tıimdi usynystardy qarastyryp jatyrmyz. Birinshi kelisimshartqa qol qoıyp alaıyq, sodan keıin ǵana jekpe-jekke qarsylas izdeımiz. Menińshe, Golovkınniń kelesi kezdesýi keler jyldyń kókteminde ótedi. Alaıda, Golden Boy promoýterlik kompanıasymen júrgizip jatqan kelissózder bul kezdesýge qatysty emes. Olar Golovkın-Alvares jekpe-jegin keler jyldyń sońynda ótkizýdi uıǵaryp otyr, mamyr aıynda "Kanelo" ózge boksshymen judyryqtaspaqshy. Sondyqtan, Golovkın men Alvares arasyndaǵy úshinshi jekpe-jekti qyrkúıek nemese jeltoqsan aılarynda kórýimiz múmkin", - dedi Leffler.
Eske salaıyq, qos boksshynyń arasyndaǵy alǵashqy jekpe-jek tóreshiler sheshimimen teń aıaqtalǵan bolatyn. Al, ekinshi kezdesýdegi jeńis taǵy sol tóreshilerdiń sheshimimen Alvareske berildi.
