Sońǵy úsh kúnnen beri bir-birine kóńil aıtyp jatqan qazaq búgin zamanynyń zańǵar jazýshysy Sherhan Murtazany aqtyq saparǵa shyǵaryp saldy. Qara ormandaı qazaqtyń qamyn kúıttep, qalamymen de, qaısar minezimen de qoǵamnyń damýyna úles qosqan aıaýly azamatpen qoshtasýǵa Úkimet adamdarynan bastap, qarapaıym oqyrmanǵa deıin keldi...    

Sheraǵanyń murdesi qoıylǵan drama teatrda jazýshynyń keıipkeri Rysqulov qýdalanatyn 37-niń yzǵaryn eske túsiretindeı muńdy áýen oınap tur. Aýyr únsizdik jaılap, jazýshynyń qabyrǵaǵa ilingen sýreti jınalǵan jurtqa ún qatyp, rýhty aqyl aıtardaı kórinedi. Akademıalyq tetarǵa kelip jatqan, qaıǵy basqan qalyń el tereń kúrsinip, bir-birine aqyryn ǵana kóńil aıtady.

«El parlamentiniń birneshe shaqyrylymynda depýtat bolǵan Sheraǵa elimizdiń saıası qoǵamdyq ómirine de belsene aralasyp, memleket múddesi jolyndaǵy óziniń azamattyq bar bolmysymen elge qyzmet etýdi ǵana oılady. Ult baspasóziniń birneshe býynyna ustaz bolǵan, onyń shekpeninen shyqqan shákirtteriniń ózi de bir-bir bıikke shyqty, tulǵa bolyp qalyptasty. Osynaý sanaly ǵumyrynda qazaq baspasóziniń bárine jýyq basshylyq jasaǵan ol qaı qyzmette de ózin ózgeden oqshaýlap turatyn eljandylyq, memleketshildik qasıetti saqtaı bildi», – dedi Almaty qalasynyń ákimi Baýyrjan Baıbek.

«Ulttyq baspasózdiń bıik báıteregi», «Aqıqattyń aldaspany, shyndyqtyń shyraqshysy», «Aqylshy abyz». Dál osy maǵynadaǵy teńeýler tuǵyry bıik tulǵa – Sheraǵanyń atyna sońǵy eki-úsh kúnnen beri toqtaýsyz aıtylyp jatyr. Qazannyń qara sýyǵyndaǵy qaraly habarǵa Elbasydan bastap, premer-mınıstr, senat tóraǵasy syndy Úkimettegi kóptegen beldi ókilderdiń attarynan arnaıy joldanǵan jedelhattar jurtqa jetkizildi. Abyz aqsaqaldar Alashqa basý aıtty.

«Uǵymǵa syımaıtyn minezi bar, uǵymǵa syımaıtyn jáne «Myltyqsyz maıdan» sekildi shyǵarmalary bar azamat, tulǵa. Ol bizden eshteńe dámetpeıdi. Bizden tek qana duǵa ǵana kerek. Endi aınalaıyn Sherhan, aldyń jaryq, ımanyń joldas bolsyn!», – dedi Qazaqstannyń halyq jazýshysy Ábdijámil Nurpeıisov.

Sherhan Murtaza – oqyrmanyn shyǵarmanyń zamanyna jetelep ketedi. Onyń týyndylaryn qolǵa alǵan adam demin ishke tarta tapjylmaı oqyp, jumyr jerdegi qazaqtyń basynan keshken tamuq taǵdyryn, aýyr zamanyn aınasyz kóz aldyna elestete alady. Bul onyń shyǵarmashylyqtaǵy sheber sýretkerligi bolsa, qoǵamdaǵy saıası tartysta da tarıhı isterdi atqarǵany óz aldyna bólek áńgime. «Sosıalısik Qazaqstan» gazetiniń ataýyn alǵan betinen qaıtpaı júrip, «Egemen Qazaqstanǵa» aınaldyrǵan oqıǵa da Sherhan Murtazaǵa tıesili. Ulttyq arnanyń tizginin ustaǵanda bastaǵan baǵdarlamalary úzdiksiz áli de jalǵasyp kele jatsa, páterge jyrǵap qalǵan jýrnalıserdiń qýanyshty dáýiri de osy Sher-aǵańnyń eńbegi edi deıdi shákiritteri.

«Qaısarlyǵy, qaıratkerligi áli talaı urpaq zertteıtin, sonyń biz baıqamaǵan tusyp baıqap, sonyń qanat bitiretinine biz senemiz. Sondyqtan búgin mynandaı qaraly jıynyń tusynda áýeli kóńildi sol qaraly jurtqa, Sher-aǵańdy essiz súıgen eline aıtqymyz keledi. Sherhan Murtazanyń qalamdastaryna, zamandastaryna, shákirtterine aıtqymyz keledi. Jatqan jerińiz jaıly bolsyn, Sheraǵa!», – dedi aqyn, jazýshy Nurlan Orazalın.

86 jasynda ómirden ótken ózgeshe taǵdyr ıesiniń artynda tom-tom kitaptarynan ózge, uly men qyzy qaldy. «Rýhy men namysy sóngen el – ólgen el» dep, únemi ulttyń «uıyqtap ketpeýin eske salyp otyratyn Sheraǵa ózi úlgi tutyp ósken ańyz-adam – Baýyrjan Momyshulynyń janyna jerlendi.