Eń tómengi eńbekaqyny 1,5 esege, búdjettik sala qyzmetkerleriniń jalaqysyn 35 paıyzǵa ósirý kerek. Bıylǵy joldaýdaǵy Prezıdent júktegen bul tapsyrma halqymyzdyń 10 paıyzǵa jýyǵynyń naqty tabysyn arttyrady deıdi Almaty ákimi Baýyrjan Baıbek. Búgin megapolıs basshysy qala aktıvimen kezdesip, joldaý júktegen mindetterdi saralap shyqty.  

Halyqtyń turmys sapasyn arttyrý, áleýmettik sektorǵa mán berý men qaýipsizdik sapasy bıylǵy joldaýda basty nazarǵa alyndy. Halyq densaýlyǵy da eń mańyzdy qundylyq retinde atalyp ótti. Elbasy 2020 jylǵa qaraı búkil turǵyndardyń elektrondy pasporty jasalyp, kezekter men búrokratıany joıýdy  nyqtap tapsyrdy. Ult saýlyǵyn saqtap turý úshin halyqty sapaly azyq-túlik, kıim-keshekpen qamtamasyz etýdi, bul oraıda otandyq óndiristi qoldap, «Bıznestiń jol kartasy» syndy baǵdarlamardy áli de nysanada ustaýdy qadap aıtty. Baýyrjan Baıbek jyl sońyna deıin Almatydaǵy barlyq qalalyq emhanalar qaǵazsyz jumys isteý júıesine kóshedi dedi. Al Prezıdenttiń bıylǵy joldaýyn «halqymyzdyń áleýmettik ahýalyn edáýir arttyrýǵa baǵyttalǵan teńdessiz aýqymdy qujat» dep atap ótti.

«Elbasy joldaýynda qazaqstandyqtardyń ál-aýqatynyń ósýi basty basymdyqqa ıe bolýy tıis dep erekshe atap ótip, eń tómengi eńbekaqyny 1,5 esege, búdjettik sala qyzmetkerleriniń jalaqysyn 35 paıyzǵa ósirýdi tapsyrdy. Bul halqymyzdyń 10 paıyzǵa jýyǵynyń naqty tabysyn arttyryp, azamattardyń qalyń jigine úlken kómek bolmaq. Orynsyz rásimderdi meılinshe azaıtý, İshki ister organdaryn jańǵyrtý jónindegi jol kartasyn ázirleý, sybaılas jemqorlyqpen kúresti kúsheıtý, memlekettiń ashyqtyq jáne eseptik qaǵıdattaryna negizdelgen qyzmet júıesin jetildire túsý – halyqtyń senimin arttyrýdyń birden bir joly», – dedi Almaty qalasynyń ákimi Baýyrjan Baıbek.

Budan bylaı megapolısti tartymdy etýge den qoıylmaq. Aldaǵy 15 jylda qoǵamdyq kólikpen júretinder sanyn 4 esege ósirý mindeti tur. Júrginshiler men velosıpedshiler jolyn úsh esege arttyrý qajet. Al jeke transport sany búgingi deńgeıinde saqtalýy qajet. Qazir Almatyda 600 myńǵa jýyq avtokólik tirkelgen. Eger bul sandy saqtamasaq ekologıany qurtamyz deıdi qala basshysy.

«2035 jylǵa deıin biz 700 myń adamdy bilim, densaýlyq, IT, óner jáne týrızm salalarynda jumyspen qamtamasyz etýimiz kerek. Ol úshin sapaly bilim men densaýlyq saqtaý salasy damyǵan qolaıly, ınovasıalyq jáne ekologıalyq orta qalyptastyrýymyz qajet», – dep atap ótti Baýyrjan Baıbek.

Al qashanda basty másele bolǵan baspana jaıy nazardan tys qalǵan joq. Halyqqa qolaıly turǵyn úıler salý da negizgi maqsattardyń biri bolmaq.

«Alataý, Naýryzbaı sıaqty shet aýdandardyń da turǵyndary úshin barlyq qyzmet qoljetimdi bolýy tıis. Dúken, mektep, balabaqsha, qajetti demalys oryndary, bári-bári adamdardyń ózi turatyn aýmaǵynan tabylýy kerek», – dedi Almaty ákimi.

Bıylǵy joldaýda barsha ustazdarynyń kópten kútip júrgen máseleleri dóp basyp aıtyldy. Ol – muǵalimderge bilim berýden basqa mindetterdiń júktelmeýi, olardyń qoǵamdaǵy róli men abyroıy. Ustaz mártebesiniń zańmen bekitiletini barsha muǵalimder qaýymyn qýantty.  

«Ustazdardyń bedelin kóterý shynynda da qýantatyn jańalyq boldy. Qazir ustazdyń bedeli bitti desek te bolady. Ustaz bedeliniń tómendegeni sonshalyq, tipten shegine jetti. Ustazǵa qoǵamnyń kózqarasy da ózgerip ketti. Shyn mánisinde, tereń bilim alatyndaı, ustazdyń sol bilimdi berýge jan-jaqty múmkindigi bolatyndaı jaǵdaı bolady dep senemin», – dedi Qazaqstannyń eńbek eri, qurmetti ustaz Aıagúl Mırazova.

«Bul joldaýǵa men tek qana halyqqa joldaý retinde ǵana qaramaımyn. Men ony Qazaqstan halqynyń damý strategıasy, ult jospary jáne manıfesi retinde de qarastyramyn. Mektep problemasy, muǵalimderdiń statýsy týraly zańdy qabyldaý máselesi, jastarǵa arnalǵan baǵdarlama, «Nurly jol», «Nurly jer» baǵdarlamalaryn ary qaraı damytý, turǵyndardy áleýmettik jaǵynan qorǵaý máseleleri jaqsy kóterilip otyr», – dedi M.O.Áýezov atyndaǵy Ádebıet jáne óner ınstıtýtynyń dırektory Ýálıhan Qalıjan.

Elbasy óz joldaýynda jastar men otbasy ınstıtýtyn keshendi qoldaý – memlekettik saıasattyń basymdyǵyna aınalýy qajet dep atap ótti. Sondaı-aq, kelesi jyldy «Jastar jyly» dep jarıalaýdy usyndy. Osy oraıda, Almaty ákimi jastardy bilimge baýlý úshin aldymen olarǵa qolaıly jaǵdaı jasap, stýdentterdi jataqhanamen qamtý qajet dedi.  

«Stýdentterdi jataqhanamen qamtý boıynsha júıeli jumys júrgizilýde. Ekeýi salyndy, jyl sońyna deıin taǵy ekýiniń qurylysy aıaqtalady. Kelesi jyldyń ortasyna deıin 3 jataqhana paıdalanýǵa beriledi. Bul 3000 stýdentti jatatyn orynmen qamtıdy. Bul da bilim salasyna oń áser eteri anyq. Aldaǵy eki jylda 19 myń orynǵa arnalǵan 37 jataqhana salynady. Biz barlyǵyna jer taýyp qoıdyq», – dedi Almaty qalasynyń ákimi Baýyrjan Baıbek.

«Osy joldaý arqyly jastardyń barlyq kókeıkesti máselelerin kótere otyryp  kelesi jyldy Jastar jyly dep jarıalaýy biz úshin úlken syılyq retinde qabyldadyq. Jalpy, osy bastamany biz 5 áleýmettik bastamanyń jalǵasy retinde qabyldadyq», – dedi magıstrant Gúljaına Ánýarbekova.

Keler jyly elimizde kem degende, 100 sport kesheni salynýy qajet. Elbasy Nursultan Nazarbaev halyqqa arnaǵan joldaýynda osyndaı tapsyrma qoıdy. Sonymen qatar, dene shynyqtyrý jáne saýyqtyrý ortalyqtary balalar men jasóspirimder úshin qoljetimdi bolýy kerek dedi. Sport maıtalmandary da deni saý ult qana eldiń ál-aýqatyn arttyrýǵa jumys isteı alady degen pikirde.

«Elbasy 2018 jylǵy joldaýynda sportqa erekshe toqtalyp ketti. Ol kisiniń 2030 jylǵa deıin Qazaqstan halqynyń 30 paıyzy sportpen shuǵyldanýy kerek degen tapsyrmasy bar. Sol mejege jaqyndap qaldyq», – dedi olımpıada chempıony, bokstan olımpıadaǵa daıyndyq ortalyǵynyń dırektory Ermahan Ibraımov.

Baýyrjan Baıbek halyqty sapaly medısınalyq qyzmetpen qamtý, ınfraqurylymdy damytý, bilim berý jáne buqaralyq sportty damytý haqynda jaýapty basqarmalar men basshylarǵa naqty tapsyrmalar júktedi. Almaty aktıvi endi joldaý aıqyndap bergen mindetterdi júzege asyrýǵa kirispek.