Almaty qalasy máslıhat depýtattyǵyna kandıdat Asqat Shilikbaev Jetisý aýdany turǵyndarynyń nazyn tyńdady. Úmitkerdiń saılaýaldy baǵdarlamasymen tanysqan jurt aýla tazalyǵyn qadaǵalap, joldy jóndep berýin surady. Asqat Qashqynbaıuly jergilikti halyqtyń ózge de eskertpeleri men suraqtaryn eskeretinin aıtyp, barlyq máseleni túrtip aldy.
«Maǵan bul jerde mindetti túrde jaryqtandyrý jumystaryn, sý máselesin, joldardy kúrdeli jóndeýden ótkizý máselelerimen aınalysý kerek. Qaraýsyz qalǵan ǵımarattar óte kóp. Ol máseleni sheshý kerek, ne qalpyna keltirý nemese tazalaý kerek. Súıinbaı kóshesindegi temirjol vokzalynda ornalasqan turǵyn úıler mańyndaǵy qoqystardy tazartyp, azdap bos keńistik jasaǵan jón», – dedi Almaty qalasy máslıhat depýtattyǵyna kandıdat Asqat Shilikbaev.
Túrksib aýdanynyń turǵyndarymen kezdesken úmitker Gúlnas Kenjetaıqyzyna jınalǵan jurt san saýal joldady. «Qaırat» yqshamaýdanynyń turǵyndaryn eń aldymen qaýipsizdik máselesi alańdatyp otyr. Turǵyndar beınebaqylaýdyń joqtyǵynan úıimizden uzaı almaımyz deıdi. Yqshamaýdanda áli kúnge deıin aty joq kósheler de kóp eken. Óz kezeginde kandıdat ózekti máselerdi jazyp aldy.
«Qazir jas «Qaırat» yqshamaýdanyndamyz. «Qaırat» yqshamaýdany 2013 jyly Almaty qalasyna qosylǵan. Osy qysqa merzimniń ishinde biraz nárseler jasaldy. Jaryq, gaz, sý qosyldy. Degenmen, turǵyndardyń aıtýy boıynsha áli de kóp máseleler bar. Eger men depýtat bolyp saılansam, sol máselelerdi sheshýge kómektesýdi aldyma maqsat etip qoıar edim», – dedi Almaty qalasy máslıhat depýtattyǵyna kandıdat Gúlnas Ahmetova.
Sondaı-aq, qala máslıhatyna úmitker Mıhaıl Grachev okrýg turǵyndarynyń ýájin tyńdady. Halyqty avtobýstar sany, jol sapasy, kósheni jaryqtandyrý jáne demalatyn oryn tapshylyǵy alańdatýda.
«Bul aýdannyń máselelerin birinshi kezekte qaraý kerek dep oılaımyn. Óıtkeni, halyqtyń aıtqandary oryndy. Bul jerde qoǵamdyq kólik jaıy óte ózekti bolyp tur. Halyq okrýgte avtobýs jetkiliksizdigin aıtty. Jańa baǵyttar qosylsa, turǵyndar ońaı qatynaıtyn edi», – dedi Almaty qalasy máslıhat depýtattyǵyna kandıdat Mıhaıl Grachev.
Aıta keteıin, qalalyq 3 máslıhat depýtatynyń bos oryndaryna 9 kandıdat saılaýǵa túsýde. Onyń úsheýi áıel adam. Al saılaý 28 qazanda Túrksib jáne Jetisý aýdandarynda ornalasqan 3 okrýgte ótedi.
