Jýrnalıserdiń jıyny. Óńirlik buqaralyq aqparat quraldary ózara tájirıbe almasty. Semınar-trenıngke elimizdiń tórt oblysynan medıanaryqtyń belsendi músheleri jınaldy. Aqparat alamanynda aımaqtyq arnalar men basylymdardyń búgingi jaı-kúıi talqylandy. Respýblıka boıynsha BAQ-tyń 70 paıyzdan astamy óńirlik komýnıkasıaǵa tıesili ekenin eskergen sala mamandary aqparat almasýdyń asa mańyzdy ekenin alǵa tartty.
Almatyda Qyzylorda, Túrkistan, Jambyl jáne Almaty oblysynan kelgen BAQ salasynyń mamandary bas qosty.Semınarda jýrnalısik etıkadan bastap, oratorlyq qabiletti arttyrý boıynsha tıimdi tásilderdi trenerler táptishpep túsindirýge tyrysty. Sondaı-aq, janjaldy jaǵdaı týǵan kezde minez-qulyq tanyta bilý máselesi de qozǵaldy. Úsh kúnge sozylatyn jıynnyń alǵashqy kúninde-aq tis qaqqan tilshiler men BAQ-tyń barlyq qazanynda qaınaǵan aǵa býynnyń keńesine qulaq túrýge kelgenderdiń qarasy kóp boldy. Óıtkeni, mundaı basqosý medıa maıtalmandarymen tildestirip qana qoımaı, kásibı jýrnalıs bolýǵa yntalylarǵa motıvasıa bereri sózsiz deıdi qatysýshylar.
«Aýdıtorıada otyrǵan qatysýshylardyń ishinde maǵan keńes aıtatyn jýrnalıser de bar. Óıtkeni, bul salanyń qudireti de sol. Tilshiler únemi izdeniste júredi. Sondyqtan jasqa qaramaı tájirıbe almasýymyz – zańdylyq. Búgin biz joǵary kásibı turǵyda suhbat alý sheberligin birlese otyryp talqyladyq. Adamdarmen sóılesýdiń psıhologıalyq tásilderi týraly ortaq oı bólistik. Sondaı-aq, ár nárseniń shegi bolatynyn eske sala otyryp, suhbat barysynda jiberýge bolmaıtyn qatelikterdi aıttyq», – dedi táýelsiz jýrnalıs Sergeı Ponomarev.
Búginde kórermenniń kózin kógildir ekrannan taıdyrtpaı, bir baǵdarlamany sońyna deıin qyzyqtyrý qıyn ekenin jasyrmaıdy sala mamandary. Dál sol sekildi, basylym betterindegi taqyryptar da qysqa ári nusqa qoıylmasa, bir bettik aqparatty qorytýǵa oqyrmannyń zaýqy soqpaıdy. Bastysy, qalam terbegen qaýym máseleni aıtyp qana qoımaı, onyń sheshý joldaryn mamandardyń pikirimen usynýy utymdy. Al nasıhattyq málimetterdi kóptep jarıalaý arqyly buqaranyń áleýmettik jaǵdaılardan beı-jaı qalmaýynan bastap, qarjylyq saýattylyǵyn arttyrýyna septesedi. Bir ǵana Túrkistan qalasyndaǵy medısınalyq pasporttyń 80 paıyz daıyn bolýyna oń áser etý de osy BAQ-tyń enshisine tıgen eńbek.
«Semınarmen ushtastyryp otyrǵan – «Sıfrly Qazaqstan». Elbasynyń Tórtinshi ónerkásiptik jańǵyrýynda sıfrly formatty halyqqa nasıhattaý keńinen, memlekettik qyzmetti elektorondy túrde bolýdy nasıhattaý alǵa qoıyp jatyrmyz. Biz qazirgi tańda sol nasıhat jumystaryn atqarýdamyz. Túrkistan qalasy medısına salasyndaǵy elektrondy pasporttaý jaǵynan eń joǵary deńgeıde kelemiz», – dedi semınarǵa qatysýshy Aıtkúl Qońyrova.
«Memlekettiligimizdi aıqyndaıtyn, aıshyqtaıtyn rýhanı jańǵyrý baǵdarlamasyn iske asyrýdyń tetikterin, erekshe tásilderin biz osy óńiraralyq semınarǵa qatysa otyryp, júzege asyrý tásilderi ǵana emes, óńirlerde de tájıirbıe almasý maqsatynda da qoldanyp otyrmyz. Jambyl oblysynda eki telearamyz bar, 10-ǵa jýyq aqparattyq agenttigimiz bar. Negizgi, memlekettiń úlesindegi 15-ke jýyq gazet bar. Ózge de 30-ǵa jýyq táýelsiz gazet bar», – dedi Jambyl oblysy ákimdigi İshki saıasat basqarmasy basshysynyń orynbasary Berik Bagelıev.
Bas qosý barysynda buqaranyń sandyq telearnalarǵa qosylýy týraly da aıtyldy. Mysaly, 2012 jyly sıfrlyq arnamen qamtylǵan halyqtyń úlesi 23% bolatyn, 2016 jyly bul kórsetkish 77,5 paıyzǵa jetken. Al 2017-2020 jyldarǵa arnalǵan «Sıfrlyq Qazaqstan» baǵdarlamasy aıasynda kórermen sanyn 95 paıyzǵa jetkizý kózdelgen.
