Almatyda áıgili mánerlep syrǵanaýshy Alekseı Iagýdın sheberlik sabaǵyn ótkizdi. Al erteń jas sportshylarmen jeke shyǵarmashylyq kezdesý ótkizbek.

Bul bastamany osyǵan deıin Denıs Ten júzege asyryp kelgen edi. Endi ıgi dástúrdi ary qaraı onyń dostary jalǵastyrmaq. Alekseı Iagýdın «Halyq Arenada» 30 shaqty jas sportshyny topqa bólip, 1 saǵattan sheberlik sabaqtaryn kórsetti. Bolashaqta basqa da esimi elge áıgili sportshylar da keste boıynsha ótkizedi dep josparlanyp otyr.

«Ondaı múmkindik bolsa, men birden kelemin. Aldyńǵy sheberlik sabaǵyn Denıs Tenmen birge ótkizgenmin. Bul meniń tek negizgi jumysym ǵana emes, adamgershilik turǵydaǵy boryshym da. Qandaı jaǵdaı bolmasyn, adam bolyp qalý kerek. Ósip kele jatqan jas sportshylarǵa bilgenimdi úıretkim keledi. Kóktemde Reseıde mánerlep syrǵanaýdy úıretetin óz mektebim de ashylyp qalar. Alǵan bilimdi bólisý de kerek dep oılaımyn», – dedi Reseı sportynyń eńbek sińirgen sheberi Alekseı Iagýdın.

Osylaısha, áriptesteri el maqtanyshy, mánerlep syrǵanaýshy Denıs Tenniń arda esimin umyttyrmaýdy kózdeıdi. Endi kúzde «Denıs jáne onyń dostary» shoýy jalǵasyn tabýy múmkin. Sheberlik sabaǵyn ótkizýdiń ózindik qıyndyqtary bolady deıdi mamandar. Al maste- klassqa qatysqan shákirtter kóp nárseni úırengenderin aıtady.