«31 arnada» «Eńbekshi» dep atalatyn jańa komedıalyq telehıkaıanyń eksklúzıvti kórsetilimi bastalady. 12 bólimnen turatyn «Eńbekshi» telehıkaıasy kún saıyn saǵat 14.00-de «31 arnadan» efırge shyǵady.
Telehıkaıa prodúseri Sábıt Rahymbaevtyń aıtýynsha, joba óte kóńildi, izgi komedıalyq fılm bolyp shyqqan. «Telehıkaıa jaı ǵana kúlkili emes, sonymen birge ózekti máselelerdi kóteredi. Keıipkerler jıyntyq obrazdan quralǵan, sol sebepti qazaqstandyqtarǵa etene tanys. Bul – ózi turatyn turǵyn úı keshenindegi PIK jumysyna kóńili tolmaıtyn qalalyqtar jaıyndaǵy hıkaıa. Sújettik jelide ómir boıy keńse qyzmetkeri bolýdy armandaǵan, keńseden basqa jerde jumys isteıtinderdi unatpaıtyn jas jigit týraly baıandalady. Obrazdardyń bárin kúndelikti ómirden aldyq, ondaǵy adamdar bizdiń aınalamyzda da júr», - dedi joba prodúseri.
«Eńbekshi» telehıkaıasy urpaqtar arasyndaǵy bitpeıtin teketiresti sýretteıdi. Kórermen bul hıkaıadan PIK isine óziniń úlesin qosýǵa talpynyp júrgen jas maman Álisher men bastyqtyń oryndyǵyna deıin óz eńbegimen kóterilip, jumysty úırenshikti «qalpynan» ózgertkisi kelmeıtin, kertartpa túsiniktegi Jánibek esimdi qabasaqal jigit aǵasynyń arasyndaǵy tartysty tamashalaıdy.
«Eńbekshi» telehıkaıasynyń basty rólin somdaıtyn Jasulan Ómirbek: «Men úshin bul telehıkaıa, eń aldymen, belgili bir áleýmettik ortadan shyǵyp, basqa bir ortaǵa top ete túsken adam týraly oqıǵa. Soǵan qaramastan ol ózine jat ortada ornyn taba biledi. Óz keıipkerim týraly aıtsam, Álisher óte tabandy, qaıratty jigit».
Telehıkaıanyń basty keıipkeri Álisherdi Jasulan Ómirbek somdasa, Sáýle rólin Jánıa Qalıeva, Jánibek rólin Marat Qabyshev, Tamara rólin Olga Gorbýnova, Murat rólin Ernar Qyryqbaev oınap shyqqan.
Joba buǵan deıin «Jenatıkı», «Qala ańyzdary», «Qazaq star» jáne «Men seni jaqsy kórem, Qazaqstan» sıaqty jobalarmen tanymal «Bolshaıa vosmerka prod» shyǵarmashylyq tobymen birlese otyryp jasalǵan. «Eńbekshi» telehıkaıasynyń senarı avtory – Azım Saıdbaev jáne Rýstam Muhıt, qoıýshy rejıseri - Dastan Aldabek.
«Eńbekshi» telehıkaıasyn 12 qarashadan bastap kún saıyn saǵat 14:00-de « 31 arnadan» tamashalaı alasyzdar.
