Kesheli beri Qazaqstannyń úkimet basshysy jumys saparymen Almaty oblysyn aralap qaıtty. Premer-mınıstr Baqytjan Saǵyntaev Qazaqstan men Qytaıdyń shekarasynda ornalasqan ótkizý beketine baryp, ondaǵy atqarylyp jatqan jumystarmen tanysty.
Atap óter bir jaıt, «Nur joly» Qazaqstan jaǵynda bolsa, al «Qorǵas» Qytaımen shekara mańyndaǵy halyqaralyq ortalyq ekenin aıta ketken jón.
Aty aıtyp turǵandaı, «Nur joly» Prezıdent Nazarbaevtyń «Nurly jol» baǵdarlamasy aıasynda júzege asqan «Batys Eýropa — Batys Qytaı» halyqaralyq dáliziniń kirer qaqpasy.
Bul Ortalyq Azıa aýmaǵyndaǵy eń úlken ótkizý pýnkti sanalatyndyqtan onyń halyqaralyq mańyzy bar. Demek, budan shyǵatyn qorytyndy, «Nur joly» Prezıdenttiń «Nurly jol» baǵdarlamasynyń sońǵy qorytyndysy dese de bolady. Qytaıdyń «Bir beldeý-bir jol» baǵdarlamasymen shektesetin Nazarbaevtyń atalǵan jobasynyń Qazaqstan úshin tranzıttik áleýeti óte zor bolyp otyr. Óıtkeni atalǵan joba Uy Jibek jolyn jańǵyrtady. Reseı, odan ary Eýropaǵa qaraı baǵyt alatyn bul jol arqyly ártúrli júk tasymaly ótedi. Saýda qatynasyn ǵana emes, jolaýshylarǵa da qyzmet kórsetetin bul baǵyt Qytaı men Qazaqstan arasynda eń aldymen alys-beristi damytyp otyr.
Aıta keter bir jaıt, atalǵan kólik-logıtstıkalyq ortalyǵynyń qurylysy 2017 jyly bastalǵan. Aınalasy birer jyldyń ishinde qurylysy aıaqtalyp, osydan 1,5 aı buryn paıdalanýǵa berilgen ortalyqtyń 27 qyrkúıekte ashylý saltanaty ótti.
«Nur joly» baqylaý ótkizý pýnktiniń jumysy burynǵydaı emes, jeńildegen, túgeldeı avtomattandyrylǵan jáne de toqtaýsyz jumys isteıdi. Júk kólikterin shekaralyq rásimdeý kóp ýaqyt almaıdy. Munyń barlyǵyna bar-joǵy 40 mınýttaı ýaqyt ketedi
Alyp iri keshen jumys kúnderi ersili-qarsyly eki baǵytta 2500 kólikti ótkize alady. Naqty derekke júginer bolsaq, 2500-diń ishinde 300 -deı jolaýshy kóligi bar ekenin aıta ketken jón. Qarjy mınıstrligi Memlekettik kirister komıteti tóraǵasynyń orynbasary Ǵusman Ámrın keleshekte bul pýnktten 500 kólikti ótkizýge bolatynyn tilge tıek etti.
Árıne, ótkizý ortalyǵynyń halyqaralyq mańyzy óte joǵary ekenin aıttyq. Birinshiden, «Nur joly» elimizdiń ınvestısıalyq múmkindigin arttyrýǵa mol septigin tıgizedi. Ekinshiden, osy aımaqtyq ekonomıkanyń damýyna qýatty serpin beredi.
«Qorǵasty» aralaý barysynda premer-mınıstr Baqytjan Saǵyntaev shekara mańy yntymaqtastyǵynyń halyqaralyq ortalyǵynyń jumysymen de tanysty. Joba Qazaqstan men Qytaı memleket basshylarynyń bastamasymen júzege asyrylýda. Maqsat — eki el arasyndaǵy saýda-ekonomıkalyq, ınvestısıalyq, ǵylymı-tehnıkalyq jáne mádenı yntymaqtastyqty damytý.
Árıne saýda - sattyq damyǵan saıyn, kelip-ketýshilerdiń de sany arta túsetini belgili. Búl oraıda 2018 jyldyń qańtarynan qyrkúıek aıyna deıin beketten eki jaqty ótýshilerdiń jalpy sany 1 mln adamnan asqan. Bolashaqta eki jaqqa qatynaıtyn adamdardyń sany munan da ulǵaıa túspek. Óıtkeni shekara mańyndaǵy saýda alańy men ótkizý-baqylaý beketi demalyssyz, táýlik boıy jumys isteıtin bolady. Taǵy bir atap óter jaıt, «Qorǵas» mańynda bolashaqta bilim jáne oqytý, sondaı-aq iskerlik ortalyqtary, turǵyn úıler men sporttyq saýyqtyrý oryndary da salynatyn bolady.
Erkin Qaldan
