Temirtaýlyqtar «Nurly jer» baǵdarlamasy arqyly páterge ıe boldy dep jazady Qamshy.kz aqparat agenttigi. Atalmysh qalada 1990 jyldary bos qalyp, eskirgen kóp qabatty turǵyn úıler «Nurly jer» baǵdarlamasy arqyly qaıta qalpyna keltirilip jatyr.  Qazirdiń ózinde qalanyń eski aımaǵyndaǵy jóndeýdi qajet etetin 90-ǵa jýyq páter qaıta jóndeldi. Atalmysh baspanalar úıdi alýǵa úmittenip, kezekte turǵan otbasylarǵa berildi. Qýanyshty jaıtpen Qaraǵandy oblysynyń ákimi Erlan Qoshanovtyń ózi turǵyndardy jańa qonyspen quttyqtady.

Erlan Qoshanov turǵyndardy quttyqtaý barysynda bul qonystoıdyń áli de jalǵasatynyn aıtty.

«Turǵyn úı máselesin sheshý jumystary jalǵastyrylady. Qurylys júrgizýge bizde múmkindikter bar. Ol úshin «Nurly jer», «7-20-25» baǵdarlamalary boıynsha mehanızmderdi paıdalanamyz, - dedi aımaq basshysy. Temirtaýdyń damýy Elbasynyń erekshe nazarynda tur. Prezıdenttiń tapsyrmasy boıynsha aldaǵy aılarda emhananyń qurylysy bastalady. Sonymen qatar balabaqsha jáne sport kesheni salynady. Jánede temirtaýlyqtardy alańdatyp otyrǵan eń basty suraq - jylýmen qamtý máselesi de sheshilip jatyr», deıdi Qaraǵandy oblysynyń ákimi Erlan Qoshanov.

Aıta ketetin bolsaq, atalmysh kópqabatty úıdi qalypqa keltirýge 450 mln teńge qarajat jumsalǵan. Oblys ákiminiń sózine sensek, bul qarajat jergilikti búdjetten bólingen.

Kezekte turǵan 83 otbasy kópten kútip, armandaǵan páterge qol jetkizdi. 83 otbasynyń arman tilegi oryndaldy. Bul otbasylardyń kóbisi múmkindigi shekteýli jandar, búdjettik uıymnyń qyzmetkerleri men jalǵyz basty analar. Sonymen birge jańa qonysqa ıe bolǵandardyń qatarynda 27 jetim balalar da bar.

Olardyń qatarynda Erbol Nurpeıisov pen Elızaveta Aýhadıeva da bar. Olar "SOS Temirtaýdaǵy balalar aýylynyń" tárbıelenýshileri bolyp tabylady.

Erbol qazirgi tańda tehnıkalyq ýnıversıtetterdiń birinde «Aqparattyq júıe» mamandyǵy boıynsha memlekettik grant boıynsha bilim alyp jatyr. Oǵan birinshi qabattyń bir bólmeli páter buıyrypty.

Al Elızaveta Aýhadıeva bolsa úı sharýasyndaǵy áıel, jas ana. Onyń úıi joǵarǵy qabatta ornalasqan.

«Maǵan 6-qabattan eki bólmeli páter buıyrdy. Men bul páterdi uzaq ýaqyt kúttim. Páterdiń qurylysy júrip jatqan kezde uzaq ýaqyt kelip, kórip júrmin. Bul jaıt bizge kúıeýim ekeýmizge óte keremet jańaly boldy. Biz bul ýaqytqa deıin páterden páterge kóship, jaldamaly páterdi pana tuttyq. Qazir eki basymyz úsh bolyp, otbasymyzdyń sanyn qyzymyz arttyrdy. Biz búgin óte baqyttymyz», deıdi jas ana.

Jańa úıde barlyq jaǵdaı qarastyrylǵan. Barlyǵy sapaly qurylys materıaldarynan jasalypty. Sonymen birge aýlada balalarǵa arnalǵan alań da bar.

Sultan Ábish