Túrkistan oblysynda 2018 jyldyń 1 qazany boıynsha tirkelgen shaǵyn jáne orta kásipkerlik sýbektileri sany - 140 992, onyń jumys istep turǵany - 129 424. «Bıznestiń jol kartasy 2020» baǵdarlamasy aıasynda 2010 jyldan qazirgi tańǵa deıin 43 mlrd. teńgege 1500 jobaǵa qarjylaı qoldaý kórsetilgen. Nátıjesinde 6 myńnan astam jańa jumys oryndary qurylyp, búdjetke 63 mlrd. teńgeniń salyǵy túsken. Búgin bul týraly Túrkistan oblysynyń Óńirlik komýnıkasıalar qyzmetinde ótken brıfıńte Kásipkerlik jáne ındýstrıaldy ınovasıalyq damý basqarmasynyń basshysy Ǵanıbet Áýbákirov málimdedi.
Sondaı-aq, aǵymdaǵy jyly atalǵan baǵdarlama aıasynda 4,4 mlrd. teńgege 400 jobaǵa qoldaý kórsetildi.
«Atap aıtqanda, kásipkerlerdiń bankterdegi kredıtteri boıynsha paıyzdyq stavkany sýbsıdıalaýǵa 4,2 mlrd.teńge bólinip, 350 joba sýbsıdıalanǵan. Kásipkerlerdiń bankterdegi kredıtteri boıynsha ishinara 102 mln.teńge bólinip, 30 joba kepildendirilgen. Shaǵyn kásipkerlik sýbektilerine memlekettik granttar usynýǵa 60 mln. teńge qaralyp, 20 jobaǵa memlekettik granttar usynylǵan», - dedi Ǵanıbet Qanatuly.
Túrkistan oblysy boıynsha aǵymdaǵy jyldyń 9 aıy boıynsha negizgi kapıtalǵa tartylǵan ınvestısıa kólemi 163,5 mlrd.teńgeni qurady. Bul turǵyda Sozaq aýdany (26,1 mlrd.teńge), Túrkistan qalasy (16,6 mlrd.teńge) jáne Shardara aýdany (15 mlrd.tg) kósh bastap keledi. Investısıa kózi bolyp tabylatyn jeke ınvestısıalar kólemi 94 mlrd. teńgeni quraǵan.
Túrkistan oblysynda ınvestısıalardy tartý baǵytynda qolaıly ınvestısıalyq klımat qurý, sondaı-aq aımaqtyń ınvestısıalyq áleýetin arttyrý maqsatynda Elbasynyń 2018 jylǵy 29 qyrkúıektegi Jarlyǵyna sáıkes kópsalaly «TURKISTAN» arnaıy ekonomıkalyq aımaǵy quryldy.
