Aǵymdaǵy jyldyń 9 aıynyń qorytyndysy boıynsha Túrkistan oblysynyń 300-den astam ónerkásip kásiporyndarymen 323,9 mlrd.teńgeniń ónimi óndirilip, naqty kólem ındeksi 97 paıyzdy qurady. Búgin bul týraly Túrkistan oblysynyń Óńirlik komýnıkasıalar qyzmetinde ótken brıfıńte Kásipkerlik jáne ındýstrıaldy ınovasıalyq damý basqarmasynyń basshysy Ǵanıbet Áýbákirov málimdedi.
Onyń aıtýynsha, kásipkerlikti qoldaý kartasy aıasynda aǵymdaǵy jyly 16,8 mlrd. teńgeni quraıtyn 9 jobany iske qosý josparlanǵan. Onyń ishinde 4 joba qazirgi tańda iske qosyldy.
«Túrkistan oblysynda aǵymdaǵy jyly iske qosylǵan jobalardyń qatarynda Ordabasy aýdanyndaǵy PET qaldyqtaryn jáne shpateldi talshyqtar óndiretin «Green technology industries» zaýyty, Túrkistan qalasyndaǵy túıe men bıe sútin óńdeıtin «Golden Camel Group LTD» kásiporny, Sút-taýar fermasy bazasynda eshki sútin qaıta óńdeıtyn «Ordabasy eshki sút ónimderi» JSHS-i, sondaı-aq, Qazyǵurt aýdanyndaǵy alkogólsiz sýsyndar óndiretin «Kórik» sharýa qojalyǵy bar. Budan ózge, Túrkistan oblysynda 2015-2019 jyldarǵa arnalǵan kásipkerlikti qoldaý kartasyna jalpy ınvestısıa kólemi 426 mlrd. teńgeni quraıtyn 87 joba engizilip, jańadan 11 myń jumys orny ashylatyn bolady», - dedi Ǵanıbet Qanatuly.
Qazirgi tańda Túrkistan oblysynda 9 ındýstrıaldy aımaq jumys isteıdi. Aýdan, qalalardaǵy ındýstrıaldy aımaqtardyń jalpy jer aýmaǵy 533 gektardy quraıdy. Búgingi kúni Túrkistan oblysynyń ındýstrıaldy aımaqtarynda jalpy quny 80 mlrd. teńgeni quraıtyn 61 joba iske qosylýda. Nátıjesinde 3 000 jumys orny ashylmaq. Atalǵan 61 jobanyń ishinde búgingi kúni iske qosylǵan jobalar sany – 22 kásiporyn.
