Búgin «Nur Otan» partıasynyń bastaýysh uıymdarynyń respýblıkalyq forýmy óz jumysyn bastady. Alǵash ret ótkizilip otyrǵan is-sharaǵa elimizdiń ár óńirinen kelgen 600-den astam delegat qatysýda.

Aýqymdy jıynnyń basty maqsaty – bastaýysh partıa uıymdarynyń qyzmetin jandandyrýdyń tıimdi joldary men tetikterin talqylaý. Jıynnyń ashylýynda «Nur Otan» partıasy Tóraǵasynyń Birinshi orynbasary Máýlen Áshimbaev barsha qatysýshylarǵa sáttilik tilep, Forýmnyń mańyzyna toqtaldy.

– Elbasy bizge partıa qyzmetin júıeli jańǵyrtýdy tapsyrǵanyn bilesizder. Bastaýysh partıa uıymdarynyń tıimdiligin arttyrý – sol jumystyń basty baǵyttarynyń biri. Sondyqtan sońǵy aılarda osy salada aıtarlyqtaı jumystar atqarylyp, Shymkent, Qaraǵandy, Pavlodar jáne Aqtóbe qalalarynda bastaýysh uıymdardyń tórt birdeı aımaqtyq forýmy ótti. Sonyń qorytyndysy retinde búgin respýblıkalyq Forýmda bas qosyp otyrmyz. Osyndaı ıgi bastamalar bastaýysh partıa uıymdarynyń jumysyn zaman talaptaryna saı jetildirip, olardyń tıimdiligin arttyra túsetini sózsiz, – dedi Máýlen Áshimbaev.

Sondaı-aq partıa Tóraǵasynyń Birinshi orynbasary Forým barysynda aıtylǵan ózekti pikirlerdi ár nurotandyq tıimdi paıdalaný kerektigine nazar aýdardy.

– Búgingi is-sharany spıkerlerdiń monology dep emes, tájirıbe almasatyn, ózderińizdi tolǵandyryp júrgen saýaldarǵa jaýap alatyn, óz usynystaryńyz ben oılaryńyzdy jetkizetin pikir almasý alańy retinde qarastyrǵan abzal. Sondyqtan barshańyzdy ashyq jáne erkin dıalogqa shaqyramyz. Óıtkeni mundaı jıynda jańa ádis-tásilder úırenip, tájirıbe almasyp, jumys tıimdiligin arttyrýdyń joldaryn saralap, saraptaýǵa mol múmkindik bar, – dedi Máýlen Áshimbaev.

Sonymen qatar Forým jumysyna Ulttyq ekonomıka mınıstri Tımýr Súleımenov, Qoǵamdyq damý mınıstri Darhan Qaletaev, Densaýlyq saqtaý vıse-mınıstri Lázzat Aqtaeva, Bilim jáne ǵylym vıse-mınıstri Asqat Aıtmaǵambetov jáne Eńbek jáne halyqty áleýmettik qorǵaý vıse-mınıstri Nurjan Áltaev qatysyp, Elbasynyń 5 qazandaǵy Qazaqstan halqyna Joldaýy men Qazaqstan Respýblıkasy Prezıdentiniń Bes áleýmettik bastamasyn iske asyrý sheńberinde bastaýysh partıa uıymdarynyń qyzmetin jandandyrý máselelerine qatysty óz oılarymen bólisti.

Eki kúnge jalǵasatyn Forýmnyń birinshi kúninde paneldi sesıalar ótti. Onda partıalyq jumystyń halyqaralyq tájirıbesi, buqaralyq aqparat quraldary men áleýmettik jelilerdegi jumystyń zamanaýı tehnologıalary, partıalyq kadrlyq rezerv qalyptastyrý, bastaýysh uıym jumysyn baǵalaý júıesi jáne taǵy basqa da kóptegen máseleler talqylanýda. Spıkerlerdiń arasynda sheteldik sarapshylar men Parlament depýtattary da bar.