Atyraý qalasynyń qos birdeı turǵyny áleýmettik jelide terorızmdi nasıhattaǵany úshin qamaýǵa alyndy.  Bul týraly "Qamshy" portaly "Times.kz"-ke silteme jasaı otyryp habarlaıdy.

Qamaýǵa alynǵan qos birdeı azamat tergeý barysynda ózderiniń áleýmettik jelilerinde Sırıadaǵy ISHIM sodyrlary sapyna qosylýǵa nıetti ekendikterin jáne ózge de dostaryn soǵan úgittegenderin moıyndaǵan.

Atylmysh iske qatysty Atyraý oblystyq mamandandyrylǵan aýdan aralyq soty kúdikti dep tanylǵan qos azamatty qylmystyq jaýapqa tartyp, bas bostandyqtarynan aıyrý týraly sheshim shyǵarǵan. Qamaýǵa alynǵandardyń bireýi  kámelet jasqa tolmaǵandyqtan arnaıy kolonıaǵa jiberý týraly uıǵarymǵa kelgen. Atyraý oblystyq soty baspasóz-qyzmetiniń málemetine súıensek, qamaýǵa alynǵan azamattar áleýmettik jelilerde qazaqstandyqtardy ISHIM sapyna qosylýǵa úndep, jıhadqa shaqyrǵan.

"Aıptalýshylar QR Qylmystyq kodeksiniń 233-1 babynyń 2 tarmaǵy boıynsha, ıaǵnı QR aýmaǵynda terorızmdi nemese ekstrımızmdi nasıhattaý, terrorlyq nemese ekstrımıstik aktiler jasaýǵa úgitteý áreketterin jasaǵandary úshin kináli dep tabylǵan. Sot barysynda aıyptalýshylardyń ekeýi de ózderiniń kinálaryn tolyqtaı moıyndaǵan. Olar ISHIM qurylǵanyn estip, Sırıadaǵy shaıqastarǵa qatysý úshin, Sırıaǵa attanbaqshy bolǵan jáne ózderiniń tanystaryn da úgittegen. Tipti, aıyptalýshylardyń eresegi óziniń ISHIM sodyrlarymen baılanys ornatqanyn, tikeleı telefon arqyly habarlasyp turǵanyn da aıtqan",-deıdi sot tóraǵasy.

Al kámelet jasqa tolmaǵan, aıyptalýshy, ISHIM týraly birz aqparattarǵa qanyq bolǵanyn, olardyń vıdeo rolıkterin kórip, tipti olardy óziniń áleýmettik jelilerinde taratqanyn sot otyrysynda aıtqan.

Sot sheshimimen aıyptalýshylardyń ár qaısysy 5 jylǵa bas bostandyqtarynan aıyrylǵan. Aıyptalýshy(úlkeni) túzetý kolonıasyna jiberilse, kámelet jasqa tolmaǵan bala arnaıy tártiptik kolonıasyna jiberilgen.

Nurzat Toǵjan