Prezıdentterge qandaı as ázirlenedi, bolmasa, olardyń aspazshylary kim degen saýal kópshilikti qyzyqtyrary sózsiz.

14 sáýirde tusaýkeseri ótken “Astananyń aq dastarqany” atty jańa fotoalbom kitaby osy suraqtarǵa jaýap berýge tyrysypty. “Astananyń aq dastarqany” atty kitap Aqordanyń mártebeli asqanasy týraly kóp derek beretin týyndy dep habarlaıdy BNews.kz. Kitap qazaq, orys jáne aǵylshyn tilderinde jaryqqa shyǵyp otyr. Avtorlar memleket basshylary ózimiz oılaǵandaı “álemde joq tamaqtarmen” emes, qarapaıym, qoljetimdi azyq-túlikten daıarlanatyn jáne reseptisin bilseńiz, ózińiz de daıyndaı alatyn tamaq túrlerin tutynatyndyǵyn aıtýda. “Bul kitapqa kóp eńbek sińirdik. Aqordadaǵy búkil aspazshylardyń, jalpy asqanadaǵy barlyq qyzmetkerdiń teri tógildi. Kitapta jazyp shyqqan taǵam túrlerin osy ýaqytqa deıingi eńbegimizdiń esebi retinde usynyp otyrmyz desek bolady. Kitapqa jazǵan taǵam túrleri eń tańdaýly, ıaǵnı, memleket basshylary deńgeıindegi qonaqtarǵa ázirlenetin taǵamdar. Jalpy, Aqordanyń asqanasynda jasalatyn taǵamdardyń arasynda óte joǵary sheberlikti qajet etetin taǵamdar bar. Iaǵnı, ondaı as túrlerin pisirý úshin belgili bir tehnologıalardy, ádis-tásilderdi paıdalaný kerek. Biraq, taǵamdardyń 70 paıyzyn ońaı pisirýge bolady”, – deıdi kitap avtorlarynyń biri, Prezıdent isiniń basqarmasy “Qaratótkel” RMK dırektorynyń orynbasary Artem Kansev. Kitap bes taraýdan turady jáne qaladaǵy “Meloman” saýda jelisiniń dúkenderinde satylady. Birinshi taraýynda halqymyzdyń ǵasyrlardan beri kele jatqan as daıyndaý dástúri, ekinshi taraýynda ártúrli elderdiń, uly saıasatkerlerdiń “asqanasy”, úshinshi taraýda joǵary laýazymdy qonaqtarǵa as daıarlaýdaǵy Qazaqstannyń tájirıbesi, tórtinshi taraýda prezıdentterdiń jaqsy kóretin astary týraly aıtyla kele, qorytyndy bólimde Aqorda aspazshylarynyń suhbaty berilgen. Kitaptyń sońynda Aqordanyń resepterin de oqı alasyz. Aıta keterligi, Aqordanyń aspazshylary únemi shet elderge baryp tájirıbe almasyp, sheberlikterin jetildirip otyrady. Byltyr shet memleketterden oqýdan ótken aspazshylary 50-den astam jańa as túrin oılap tapsa, 2014 jyly Aqordany asqanasy 110 resmı qabyldaý ótkizgen eken.