Keıingi kezde dástúrli aqparat quraldary men ınternet resýrstar, áleýmettik medıa arasynda aqparat taratýda básekelestik baıqalyp júr. Alaıda, bıylǵy saılaý naýqany kezinde baıqaǵanym, ádettegideı dástúrli aqparat quraldary aldyńǵy qatarda tur. Áleýmettik medıa mundaı kezeńde umyt qalmaýy tıis. Sebebi jeke jáne korporatıvti akkaýnttar aldaǵy ýaqytta úlken saıası naýqandarda jeke ári táýelsiz resýrstardyń rolin atqaratyn bolady.

2008 jylǵy saılaý kezinde asa mán bermegenimen, AQSH-ta 2012 jyly ótken prezıdent saılaýy naýqany kezinde Barak Obama jáne onyń komandasy áleýmettik jelilerdi óte belsendi paıdalandy. Saıası naýqannan keıin alynǵan arnaıy sýalnamaǵa qatysqandardyń 30 paıyzy áleýmettik medıadaǵy túrli posttardy oqyǵannan keıin qatysqanyn moıyndasa, 20 paıyzy áleýmettik jeliler bastapqy tańdaǵan kandıdatyna emes, onyń qarsylasyna daýys berýge yqpal jasaǵanyn aıtqan.

Bizdiń elde de áleýmettik jeliler 2010 jyldan bastap qana belsendi paıdalanyla bastaǵanymen, ol 2011 jylǵy prezıdenttik saılaýǵa da, 2012 jylǵy parlamenttik saılaýǵa da aıtarlyqtaı yqpal ete alǵan joq.

Qazir jaǵdaı sál basqasha. Kezekten tys prezıdenttik saılaý týraly usynys túsken kúnnen beri áleýmettik jelide saılaý taqyryby trendke aınaldy. Úgit-nasıhat jumystary kezinde kandıdattardyń shtabtary jaqsy qoldanyp júr. Óıtkeni áleýmettik jeliler ýaqyty qymbat televıdenıe men joly qymbat gazet-jýrnal emes. Ortalyq saılaý komısıasy men jastar uıymdary áleýmettik medıalarda saılaýǵa qatysýǵa yntalandyrýǵa aksıalar uıymdastyryp jatyr. Bul da óz kezeginde elektorattyń saılaýǵa qatysý kórsetkishin ósirip jibermese de, belgili bir dárejede yqpal etedi dep esepteımin.