Mánerlep syrǵanaýdyń chempıony Gúljan Jumadilova Startime kraýdfandıng (halyqtyń aqsha jınap berýi, qazaqshalap aıtqanda jylý-red.) alańy arqyly qajetti kıimine aqsha jınap jatyr eken. Máskeýde jattyǵyp júrgen qyzymyz 400 000 teńge turatyn jańa kánkı satyp alýǵa qaýqarsyz ekendigin jetkizdi. Ágárákı halyqtyń kúshimen jınalǵan soma mejeden assa, Gúljan óner kórsetýge arnalǵan qajetti kıim-keshek satyp alýǵa qarsy emes.
Qysqasy, shyǵyndar mynadaı bolmaq:
- Muz – 75 000 teńge ($200)
- Kánkı – 400 000 teńge ($1080)
- Jattyqtyrýshynyń jumysy– 150 000 teńge ($400)
- Kostúm – 200 000 teńge ($540)
Barsha otandastaryna chempıon qyz Máskeýde júrgenine óz kóligin satqan qamqor ákesiniń aldynda qaryzdar ekendigin aıta otyra, ótinishin bylaısha jetkizdi: «Armanym – kánkı tebý, shet elderdegi saıystarda boı kórsetý, Qazaqstannyń abyroıyn asqaqtatý, jas sportshylardy shabyttandyrý. Maqsatyma jetý úshin maǵan sizder sıaqty jany ashıtyn, meıirimdi jandardyń qol ushyn sozǵandary qajet».
Búgingi tańda 113 000 teńgedeı qarjy jınalyp úlgerdi. Jyldyń aıaǵy ıaǵnı jeltoqsannyń 31-ne deıin Gúljan barlyq qarajat jınalady dep úmittenip otyr. Qarapaıym otbasydan shyqqan qazaq qyzy aqshanyń joqtyǵyna qaramastan sportty tastaǵysy kelmeıdi. 16 jasqa endi tolǵan Gúljan Jumadilova kóp aqsha tússe, tıynyna deıin tek sportqa qajetti dúnıelerge jumsaıtynyn aıtty. Kámelettik jasqa tolmaǵan daryndy sportshymyzdyń qasynan kúndiz-túni anasy bir eli qalmaıdy eken.
«Men Qazaqstanǵa sportshy retinde kerekpin dep oılaımyn. Halyqaralyq deńgeılerdegi saıystarda maǵan úmit artsa bolady. Áke-sheshem tyǵyryqqa tireldi. Maǵan reseılik demeýshiler Reseıdiń atynan óner kórsetýge qolqa salyp jatyr. Alaıda men óz Otanymdy satqym kelmeıdi» dedi Gúljan.
Áıgili sportshymyz Denıs Tenniń qazasynan keıin eseńgirep qaldyq. Kánkı áleminde qazaqtyn atyn dúrkiretip shyǵaryp júrgen jalǵyz ózi sıaqty kórindi. Denıstiń ókshesin basyp kele jatqan Gúljan Jumaǵulovaǵa QR Mádenıet jáne sport mınıstri Arystanbek Muhamedıuly tarapynan qoldaý kórsetiledi degen senimdemiz.
