Reseılik chempıon Habıb Nurmaǵamedov «Olımpııskıı» arenasyna jınalǵan jankúıerlerdiń suraqtaryna jaýap berdi dep jazady Qamshy.kz aqparat agenttigi sheteldik BAQ-tyń deregin negizge aldy. Jeńil salmaqtaǵy UFC chempıony óziniń balalyq shaǵy týraly aıtty.
«Men jasyl kilemde kúresýge kishentaı kezimnen mashyqtanǵanmyn. Meniń ákem úıde sportzal salǵan. Men bos ýaqytymnyń barlyǵyn sol jerde ótkizetinmin. Men ózimniń bolashaǵymdy sportpen ǵana elestetetinmin. Sebebi men ákemniń tárbıesin kórip óstim. Sen eshqashan shylym shegip turyp, ishimdik iship turyp nemese úıde bos jatyp alyp balańa sportzalǵa bar, chempıon bol dep aıtýǵa haqyń joq. Óziń óz ulyńa úlgi berýiń kerek. Meniń basqa balalarǵa qaraǵanda jolym boldy. Men kez kelgen jaǵdaıda, kez kelgen bastamada ákemnen úlgi alatynmyn», dep sóz bastaldy Habıb. Sonymen birge ol qazirgi jastardyń negizgi problemasy týraly da aıtyp ótti.
«Qazirgi kezde jastardyń eń úlken qateligine sebep bolatyn dúnıe – bos ýaqyt. Balalarda eshqashan bos ýaqyt degen bolmaýy kerek. Men sabaqtan keıin bos ýaqytym bolyp qalsa, ákem únemi bir jumys taýyp beretin. Basqa paıdaly jumystardy jasaýdy mindettep, tipti májbúrleıtin. Májbúrlegeni durys boldy. Sebebi 17 jasqa kelgen jetkinshek chempıon bolýdy armandaıdy, sportzalda jattyǵady. Alaıda keı kezde basqa da balalar sekildi qydyryp, buzyqtyq jasaǵysy kelip turatyn sátter de bolady ǵoı. Sol kezde ákem meni baqylaýda ustady. Onsyz men mundaı jetistikke jete almas ta edim. Eger bir maqsat qoısań 100 paıyz nazaryńyndy sol maqsatqa aýdarýyń qajet», deıdi Habıb Nurmaǵamedov.
Nurmaǵamedov óziniń kásibı mansabynda eshqashan jeńilip kórmegen. Alaıda chempıon ózinde qorqynysh sezimi bolatynyn jasyrmady.
«Qudaı bizdi qorqynysh sezimimen birge jaratty. Sol sebepti qorqynysh men de bar. Ony jasyrmaımyn. Biraq, sol qorqynyshty jeńe bilgen adam ǵana myqty bolady. Eger qorqynysh sezimi qarsy kelse sen onyń degenine kónesiń nemese ony jeńesiń. Tańdaý óz erkińde. Sportta da jetistikke jetýdiń syry da osy bolyp sanalady. Árkimde ártúrli qorqynysh bolady. Bireýler aqshasyn joǵaltýdan, densaýlyǵynan aıyrylýdan qorqady. Men sport úshin óz densaýlyǵymdy qurban etkim kelmegen. Alaıda qurban ettim. Sebebi neshe túrli jaraqattar, operasıalar boldy. 2015 jyly úshinshi operasıa kezinde men ákeme « Múmkin bul Qudaıdyń bizge toqtat degen belgisi bolar?», - dedim. Al ákem bolsa «synaq adamǵa bas tartpaý úshin, berilmeı, alǵa jyljý úshin beriledi. Tur da jumysqa kiris» dep jaýap berdi.
Eske salsaq, UFC chempıony Habıb Nurmaǵamedov óziniń «Khabibtime» avtobıografıalyq kitabynyń tanystyrylymyn ótkizdi. Avtobıografıalyq kitap 10 jeltoqsannan bastap oqyrman nazaryna usynylady.
