Osy jyldyń jaz aıynda bolǵan úsh azamattyń ólimi eldi eseńgiretken qaıǵyly oqıǵa boldy. Almaty oblysy, Shelek aýylynyń aýrýhana aýlasyndaǵy káriz qudyǵyn tazalaý kezinde aptaldaı azamattar ajal qushty. Oǵan sebep qarapaıym qaýipsizdiktiń saqtalmaýy. Aýrýhana qyzmetkerleriniń salǵyrttyǵy, nemquraılylyǵy. Eger 6 myń teńgeni qıyp, tolyp qalǵan qubyrdy arnaıy kólikpen sorǵyzǵanda mundaı jaǵdaı bolmas edi.
Al, olar sol jerde ártúrli jumystyń besaspaby Ómirbaı men Ermek aǵalarymyzdy jumsaıdy. Qarǵys atqyr "qara shuńqyrdy" ashyp, tazalaǵanda ábden tozyǵy jetken qubyr jarylady, qudyq búkil kárizdegi las sýǵa tolady. Jınalyp qalǵan metan gazyna eki santehnık ýlanady. Aýrýhana aldynda turǵan hırýrg Jandos Ótemisov "dárigerler qutqaryńdar" degen daýystan shuńqyrǵa janushyra kómekke umtylyp, túsip ketkenin ǵana biledi. Ol kezde hırýrg- travmatolog Danıar Mergenbaev jumysta ishte otyrǵan. Uıaly telefonnyń ar jaǵynan "Jandosqa kómek kerek" degen daýystan dalaǵa atyp shyǵady da, esh oılanbastan:" Men dosymdy qutqarýym kerek" dep jumys kıimin ustata sala, qoıyp ketken. Jandosty joǵary kóterip, las sýdan basyn shyǵarǵan Danıar ózi gazǵa ýlanyp, esin joǵaltyp, tómenge shógip ketedi. Al onyń tereńdigi úsh metrden kem emes. Qutqarýshy top kelgenshe biraz ýaqyt ótip ketken. Bári de kesh... Qaıran, asyl azamattar-aı, reanımasıa tóseginde tilge kelmesten jan tapsyrdy.
Úsh birdeı otbasy aýyr qaıǵy jamyldy. Áke súıikti ulynan, balalary ákesinen, jubaılary qosaqtarynan, aǵa-inileri baýyr eti baýyrynan, týǵan-týys jaqyndarynan aıaq astynan aıyryldy.
Danıar Nursalbekuly – beıbit zamannyń batyry. Ol adal dos bola bildi, ólimge basyn tigip, Jandosty qutqardy. Allaǵa shúkir, Jandos aman qaldy. Biraq uzaq emdelýi qajet. Boıyndaǵy ýly zattardy shyǵaryp tastaý birneshe jyldyń enshisinde. Danıar men Jandosty taǵdyr jumysta tabystyrdy, jumysta bir-birinen máńgilikke ajyratty. Ázilderi jarasqan, syrlas ta syılas dos, qımas baýyrǵa aınalǵan edi.
Danıar Shelek aýylynyń aýrýhanasynda jeti jyldan astam ýaqyt qyzmet atqaryp keldi. Anasy sút kenjesi, erketaıyn jolymdy qýyp dáriger bolsyn dep kolejge odan ári ýnıversıtetke túsiredi. Sabaqty da jaqsy oqyp, aqyly bólimnen óz kúshimen grantqa aýysyp, ata-anasynyń tilegin oryndap bolashaqqa senimmen qadam basqan. Gıppokrat antyna berik, óz mamandyǵyn jany súıetin myqty ári bilikti maman boldy. Aýrýhanadan travmatologıa bólimin ashyp, sońǵy úlgidegi apparattarmen jabdyqtap, halqyna qaltyqsyz qyzmet etýdi aldyna maqsat tutty.
Shelek aýyly qara joldyń ústinde bolǵandyqtan jıi jol apattary bolyp turady. Túrli jaraqattarmen, synyqtarmen túsken adamdarǵa alǵashqy kómek jasalsa da, der kezinde em alyp shyǵýyna múmkindik joq, emdeıtin dári-dármek, apparattardyń joǵy qoldy baılaıtyn. Amalsyzdan jaǵdaıy aýyr aýrýlardy Shelekten 80 shaqyrym qashyqtyqtaǵy Esik aýdandyq aýrýhanasyna jiberetin. Osy olqylyqtardy Danıar joıǵysy keldi. Talaı ret bas dırektordyń aldyna kúrmeýi qıyn máseleniniń basyn sheship berýdi ótingen de edi... Aman bolǵanda densaýlyq salasynda talaı ıgi isterdiń uıytqysy bolyp, eliniń ardaqty azamatyna aınalar edi-aý. Átteń, ómiri short úzildi...
Osy qaıǵyly oqıǵaǵa baılanysty aýrýhana qyzmetkerleri men aýyl aqsaqaldary, turǵyndary Danıar Nursalbekulyna Respýblıkamyzda tótenshe jaǵdaılarda adam ómirin qutqarýǵa baılanysty janqıarlyq erlik kórsetkenderge "Erligi úshin" medalimen marapattaýdy, sonymen qatar, "Aýdannyń qurmetti azamaty" ataǵyn berýdi, sonymen qatar, Shelek aýylynan kóshe aty berilse eken dep joǵarǵy jaqqa ótinish jazdy."Danıar – óte aqkóńil, kópshil, meıirimdi, jyldam sheshim shyǵaratyn jaqsy dáriger, bilimdi maman boldy. Kózsiz erliktiń ıesi ataýsyz qalmaý kerek. Onyń isi kópke ónege, óz janyn aıamaı qurban bolǵan azamattyń aty urpaq júreginde máńgige qalýy kerek,"- deıdi aýrýhana qyzmetkerleri. Batyr azamattyń artynda ańyrap ákesi, baýyrlary, kózderi jáýteńdegen eki qyzy men súıikti jary jesir qaldy.
Saltanat Bakeeva
