Almatynyń Almaly aýdandyq sotynda "jıhadshylar" isi boıynsha sottalyp jatqan Almat Jumaǵulov pen Oralbek Ómirov ózderin "jazyqsyz sottaýǵa" qarsylyq tanytyp, kóktamyrlaryn tilgen. Bul jóninde sot zalynan advokaty Gúlnara Jýaspaeva habarlady dep jazady centralasian.org.
- Almaly aýdandyq sotynda sýdıa Áripov advokattyń ótinishin qanaǵattandyrýdan bas tartý sheshimin oqyp jatqanda artymyzdan shý shyqty. Ómirov pen Jumaǵulov qoldaryn tilip tastapty, - dedi Jýaspaeva.
Belsendilerdiń sottan áleýmettik jeliden taratqan tikeleı efırinde Almat Jumaǵulov pen Oralbek Ómirov "tergeý men sot prosesi barysynda quqyqtary buzylǵanyn" málimdep, áldebir temirmen qoldarynyń bilekten shyntaqqa deıingi tusyn ár jerden tilgeni kórinedi. Ómirovtiń eki qoly, Jumaǵulovtyń sol qoly qanǵa boıalǵan.
Olar ózderin toqtatpaq bolǵan sot qaraýyldarynan jaqyndamaýdy, jaqyn kelse, qoldaryn taǵy da kesetinin eskertti. Budan soń olar ózderiniń qylmystyq áreketteri "dáleldenbegenin", "jazyqsyz sottap, ózine qol salýǵa májbúrlep otyrǵanyn" aıtty. Olar sotta prokýror men jedel járdem qyzmetin keltirýdi talap etti.
Sottalýshylar jıhadshylar týraly rolıkti ózderine qarsy kýálik bergen Asqat Shárbat túsirip, taratqanyn, ol vıdeoǵa ózderiniń qatysy joǵy saraptamada dáleldengenin aıtty.
Olar osyǵan baılanysty Asqat Shárbatty jaýapqa tartýdy talap etedi.
Almatylyq úsh turǵyn - 51 jastaǵy Kenjebek Ábishev, 47 jastaǵy Oralbek Ómirov jáne 43 jastaǵy Almat Jumaǵulovty 2017 jyly qarashada polısıa "terorızm aktisin jasaýǵa jarıa túrde shaqyrýdy tekserý" dep ataǵan is aıasynda ustaǵan. Byltyr qarashanyń 28-i kúni úsheýi qamaýǵa alynyp, keıin olardy qamaýda ustaý merzimi birneshe ret uzartylǵan. Almat Jumaǵulov Qazaqstan prezıdenti Nursultan Nazarbaevty synap júrgen burynǵy bankır Muhtar Áblázov basqaratyn jáne bıyl naýryzda Astananyń Esil aýdandyq soty "ekstremıstik uıym" dep tanyp, qyzmetine tyıym salǵan "Qazaqstannyń demokratıalyq tańdaýy" (QDT) opozısıalyq qozǵalysy unaıtynyn ashyq aıtady. Al Kenjebek Ábishev "QDT-da sharýam joq, oǵan esh qatysym joq" dep málimdeıdi.
Qazaqstandyq quqyq qorǵaý uıymdary buǵan deıin Ábishev pen Jumaǵulovty "saıası tutqyn" dep tanyǵan. Bılik bul qoǵamdyq-saıası statýsqa qatysty komentarı bermeıdi.
