Oraldyq jas otbasy «7-20-25» baǵdarlamasy arqyly jeke páterdiń ıesi atandy. Talǵat Nıazǵalıev pen Aınur Tasmuhanovanyń qýanyshtarynda shek joq.  Qamshy.kz aqparat agenttiginiń tilshisine bergen suhbatynda jas otbasy erekshe áserlerimen bólisti.

Talǵat pen Aınur buǵan deıin ata-analarymen birge turǵan eken. Alaıda eki balany ósirip otyrǵan otbasy úshin bir úı tarlyq etti. Sóıtip otbasy jeke páterge aqsha jınaýdy bastap ketedi.

Talǵat «Qazaqtelekom» AQ-da ınjener bolyp jumys isteıdi, al Aınur Oraldaǵy №26 mektepte aǵylshyn tilinen sabaq beredi.

«Kez kelgen adam «jeke páterim bolsa» dep armandaıdy. Nursultan Ábishuly Nazarbaevtyń 5 áleýmettik bastamasy aıasynda «7-20-25» baǵdarlamasy iske qosylǵan soń biz aqsha jınaı bastadyq. Maǵan bul baǵdarlamadan unaǵany – páterdi ózimiz tańdaı alamyz. Biz de ózimizge yńǵaıly aýdannan yńǵaıly páter tańdadyq. Páter Soltústik-shyǵys aýdanynda ornalasqan. Ári mańynda balabaqsha da bar. Aqshany shildege deıin jınadyq. Keıin birneshe bankti aralap shyqtyq. Sońynda «Bank SentrKredıt»-ke toqtadyq. Tıisti qujattardy jınaǵan soń páterdi eki-aq kúnde rásimdedi. Páterdegi jóndeý jumystary da aıaqtalýǵa shaq qaldy. Alǵashqy tólem 20 paıyzdan aspaıdy, al jyldyq mólsher – 7 paıyz. Aı saıyn 60 myń tóleımiz», - dedi Aınur Tasmuhanova tilshimihge aıtqanynda.

Osyǵan oraı Qamshy.kz aqparat agenttigi buǵan deıin páterli bolǵan otbasylardy eske túsirip ótýdi jón kórdi.

Shildeniń aıaǵynda Osınsevter otbasy «7-20-25» baǵdarlamasy arqyly páter alǵan. 28 jastaǵy Vladımırdiń nekede bolǵanyna 5 jyl. Erli-zaıyptynyń Amelıa atty bir jarym jastaǵy qyzdary bar. 24 shildede jas otbasy 72,5 sharshy metrli páterdiń ıesi atandy.

Qamshyǵa bergen suhbatynda Vladımır maqsattaryna qalaı jetkenderin aıtyp berdi.

«Biz jańa páter alý úshin aqsha jınadyq, alaıda jas otbasy úshin aqsha jınaý degen qıynnyń qıyny ekenin ózderińiz de bilesizder. Aqsha jınap júrip Qazaqstandaǵy páter alý múmkindigi joǵary baǵdarlamanyń bárin baqylap júrdim. Alaıda tıimdisin taba almaı júrdik. Aldyn ala tólem mólsheri tym kóp boldy, tipti keı bankterde 30 mıllıon teńgege deıin jetetin. Al «7-20-25» baǵdarlamasy arqyly 15 mıllıon teńge turatyn páter úshin artyq tólem 16 mıllıon boldy.  Qazir aıyna 85 myń teńge tóleımiz. Páterdi jalǵa alyp, aı saıyn 100 myń teńge tólegennen shóri óz úıimizge aqsha bergen áldeqaıda tıimdi emes pe?», - dep pikirimen bólisken edi.

Aıta keteıik, «7-20-25» baǵdarlamasy Memleket basshysy Nursultan Nazarbaevtyń bastamasymen júzege asyryldy.

Aıta keteıik, bankter bıyl shilde aıynan bastap «7-20-25» baǵdarlamasy boıynsha ıpotekalyq nesıe berýdi bastap ketti. Al jeńildetilgen ıpotekany kimder ala alady? Bul saýalǵa QR Ulttyq bank tóraǵasy Danıar Aqyshev jaýap berdi. Aıtýynsha, ıpotekalyq baǵdarlamaǵa turaqty jumys bar kez kelgen adam qatysa alady. Alaıda ol azamattyń atynda baspana bolmaýy tıis. Jáne nesıe tarıhy da durys bolýy kerek. Budan buryn Elbasy «7-20-25» baǵdarlamasyn júzege asyrý úshin Ulttyq bank pen Úkimet birlesip jumys isteý kerek ekenin aıtqan.

«Ulttyq banktiń, ekinshi deńgeıli bankter men qor naryǵynyń múmkindikterin iske qosý kerek. Ulttyq bank keminde 1 trıllıon teńge qarjyny tartatyn arnaıy kompanıa quryp, ony bankterdiń joǵaryda aıtylǵan sharttaryna jaýap beretin jańa ıpotekalyq nesıelerin satyp alýǵa jumsaýy qajet. Baǵdarlamany júzege asyrý nátıjesinde mıllıon qazaqstandyq baspana alý múmkindigine ıe bolady», – degen edi Nursultan Nazarbaev.