Bıyl jyl sońyna deıin 1500 almatylyq salymshylar «Nurly jer» baǵdarlamasy boıynsha páterge ıe bolmaq.

Jyljymaıtyn múlik naryǵynda turǵyn úılerdiń 1 sharshy metriniń quny 179 myń teńgeni quraıdy.

Almaty qalasyndaǵy 1500-ǵa jýyq «Turǵyn úı qurylys jınaq bankiniń» salymshylary jańa páterge ıe bolyp, jaqyn arada qonys toıyn toılamaq.

Belgili bolǵandaı, «Nurly jer» memlekettik turǵyn úı baǵdarlamasy boıynsha páterler Almaty qalasynyń Alataý aýdanyndaǵy «Saıaly» yqshamaýdanynda «Jergilikti atqarýshy organdar arqyly nesıelik turǵyn úı salý» baǵyty boıynsha boı kóterýde. Turǵyn úı kesheni bes qabatty jáne kóppáterli úılerden quralady. Páterlerdiń aýdany 29 sharshy metrden 84 sharshy metrge deıin jetedi.

«Beriletin turǵyn úılerdiń 1 sharshy metriniń baǵasy 179 000 teńgeni quraıdy. Bul megapolıstegi naryqtyq baǵadan eki ese tómen. Qoljetimdi baǵamen turǵyn úıge qol jetkizý úshin de ózindik sharttardy oryndaý qajet, eń aldymen, «Turǵyn úı qurylys jınaq bankiniń» tutynýshysy bolý qajet jáne depozıtte turǵyn úı baǵasynyń, keminde 20 paıyzy bolýy shart. Nesıeniń jyldyq ósimi 5 paıyzdy quraıdy. Mysaly, shamamen 6,3 mıllıon teńge turatyn bir bólmeli páterdi satyp alý úshin, bank depozıtinde keminde 1,2 mıllıon teńge qarajatyńyz jınaýly bolýy kerek. Mundaı jaǵdaıda aı saıynǵy tólemniń baǵasy 52 500 teńgeni quraıtyn bolady», - dep málimdedi «Turǵyn úı qurylys jınaq bankiniń» mamandary.

Qazirgi ýaqytta bank 886 páterge arnalǵan pýl quryp, jyl sońyna deıin 621 páterdi satyp alýǵa ótinishter qabyldaýdy josparlap otyr. Sonymen qatar, «Turǵyn úı qurylys jınaq banki» arqyly «Nurly jer» baǵdarlamasy boıynsha iske asyrylǵan páterlerdiń berýine alty úmitkerden keledi.

«Búgingi tańda «Turǵyn úı qurylys jınaq bankiniń» ónimderi men baǵdarlamalary qazaqstandyqtar arasynda eń kóp suranysqa ıe ári tanymal bolyp otyr. Aǵymdaǵy jyldyń toǵyz aıynyń qorytyndysy boıynsha, bizdiń bank jalpy qazaqstandyq ıpotekalyq nesıe somasynyń 62 paıyzyn bergen. Bıyl 26 myńǵa jýyq otbasy, onyń ishinde 6 myń qazaqstandyq «Nurly jer» memlekettik baǵdarlamasy boıynsha páterge ıe bolyp, qonys toıyn toılady. Jáne de jyldyń sońyna deıin Almaty qalasynyń ózinde 3000-ǵa jýyq turǵyn páterge ıe bolyp, onyń 1500-y «Nurly jer» memlekettik turǵyn úı baǵdarlamasy arqyly turǵyn úıge qol jetkizbek. Bul kórsetkish elimizdegi kún tártibinde turǵan eń mańyzdy máselelerdiń biri – halyqty turǵyn úımen qamtamasyz etý máselesiniń oń sheshimin taýyp jatqanynyń aıqyn dáleli bola alady», - dedi «Turǵyn úı qurylys jınaq banki» Almaty qalalyq fılıalynyń dırektory Gúlzat Sımtıkova.

«Nurly jer» memlekettik turǵyn úı baǵdarlamasy arqyly páterler 50/50 prınsıpi boıynsha beriledi. Iaǵnı, páterdiń 50 paıyzy ákimshiliktiń kezeginde turǵan adamdarǵa berilse, qalǵan 50 paıyzy kezekke turmaǵan, alaıda «Turǵyn úı qurylys jınaq bankinde» depozıttik shot ashtyrǵan salymshylarǵa beriledi.

«Sonymen qatar, ákimdiktiń tiziminde turǵandar memlekettik turǵyn úı baǵdarlamasy arqyly páterge qol jetkizý úshin olardyń da «Turǵyn úı qurylys jınaq bankinde» depozıti bolyp, sol banktiń salymshysy bolýy shart jáne de depozıtte jınalǵan qarajaty bolýy kerek. Sebebi, páter berý memlekettik turǵyn úı baǵdarlama sheńberinde turǵyn úıdi jeńildik sharttarymen júzege asyrady jáne de sharshy metrge úmitkerler úshin naqty talaptar qoıylǵan. Olar: Qazaqstan Respýblıkasynyń azamattyǵy nemese oralman kýáliginiń bolýy; sońǵy bes jylda Qazaqstan Respýblıkasynyń aýmaǵynda múliktik menshikten (óziniń jáne únemi birge turatyn otbasy músheleriniń) turǵyn úıi bolmaýy; Almaty qalasynda keminde eki jyl tirkeýde bolýy; aı saıyn tólem jasaýǵa qabiletti bolýy jáne onyń dáleldemesi», - dep atap ótti «Turǵyn úı qurylys jınaq bankiniń» mamandary.