«Nur Otan» partıasy tóraǵasynyń birinshi orynbasary Máýlen Áshimbaev Astana qalasyndaǵy áleýmettik nysandardy aralap shyqty. Áshimbaevpen qosa Respýblıkalyq qoǵamdyq keńes músheleri de elordadaǵy bes áleýmettik bastamanyń qalaı júzege asyrylyp jatqanyn baqylap qaıtty.

Máýlen Áshimbaev pen Keńes músheleri aldymen Mıllenıým saıabaǵyna taban tiredi. Partıa tóraǵasy orynbasarynyń bul sapary da beker emes. Onda «7-20-25» baǵdarlamasymen páterli bolǵan birneshe otasy turady. Olardyń biri – Balqash qalasynan bas qalaǵa kóship barǵan Azamat pen Janar. Bir jyl boıy páterden páterge kóship sandalyp júrgen jas otbasynyń búginde jeke páteri bar. Ári buǵan sebep – «7-20-25» baǵdarlamasy. Aıtýlarynsha, aı saıynǵy tólem jalaqylarynan áldeqaıda tómen.

Máýlen Áshimbaev baǵdarlama arqasynda páterli bolǵan otbasyn quttyqtap, Astana qalasynyń múmkindikterin atap kórsetti.

«Astana – elimizdiń bas qalasy. Turǵyndardyń sany jyl sanap ósip keledi. Búgin Astana qalasynda 1 mıllıonǵa jýyq adam turady. Sol sebepti elordada páter máselesi ózekti. Al Memleket basshysynyń 5 áleýmettik bastamasy men «7-20-25» baǵdarlamasy bul máseleni sheshýge kómektesedi. Baǵdarlama arqasynda qazaqstandyqtar úıli bolady degen senimdemin. Turǵyndardyń barynsha atsalysqany ıgi», - dedi Máýlen Áshimbaev óz sózinde.

Sonymen qatar, Elbasynyń bastamasymen júzege asyp jatqan baǵdarlamanyń arqasynda qurylys salasy da damyp keledi. Bul ekonomıkanyń ósýine tikeleı áser etpek.

 «Baspana» ıpotekalyq uıymynyń málimetinshe, Astana qalasynda jyl basynan beri 840 ótinish qabyldanǵan. Olardyń 584-i maquldandy. Bul respýblıka boıynsha kórsetkishtiń úshten biri ǵana.

Budan keıin Astanany aralap júrgen delegasıa joly Ál-Qýat jataqhanasyna tústi. Jataqhana Elbasynyń bes áleýmettik bastamasy aıasynda salyndy. Ári stýdentterdiń bilim sapasyn arttyrýǵa yńǵaıly jaǵdaı jasalǵan. Kompleks dırektory Gúljanat Maýsymbaevanyń aıtýynsha, jataqhana 2015 jyly 400 oryn bolyp ashylǵan. Aýmaǵy 5 myń sharshy metrdi quraıdy. Jalpy 90 bólmesi bar jataqhana ishinde 150 oryndy asqana men 120 oryndy májilis zaly da bar.

Jataqhana jaǵdaıymen tanysqan partıa delegasıasy Astanada 35 kolejdiń baryn bildi. Jalpy 26 myń stýdent bilim alady eken. Stýdentterdiń 2000-y jataqhanada turmaıdy. EXPO halyqaralyq kórmesinen keıin búginde qalada 100-ge jýyq qonaq úı men  9000 oryndy jataqhana bar.

Ýnıversıtetter men kolejderdiń bárin eseptegende elordada jalpy sany 16 myń stýdent jataqhanaǵa muqtaj. Bul máseleni sheshý úshin qala ákimdigi EXPO halyqaralyq kórmesinen keıin qalǵan jataqhanalardy ýaqytsha paıdalanýǵa berdi. Alaıda bolashaqta jańa jataqhanalar salynatyn bolady.

Óz kezeginde «Nur Otan» partıasy tóraǵasynyń orynbasary Máýlen Áshimbaev mundaı qadamnyń tıimdi ekenin aıtady.

«Jataqhanalar sapaly bilim alý úshin tıimdi oılastyrylǵan joba. Stýdentterdi baspanamen qamtamasyz etýdiń bul joly jaqsy oılap tabylǵan. Osy oraıda Elbasymyzdyń 5 áleýmettik bastamasy qalada sátti júzege asyp jatqanyn baıqaýǵa bolady. Al «Nur Otan» partıasy bastamalardyń jyldam ári sapaly oryndalýy jaǵyn qamtamasyz etetin bolady», - dedi Áshimbaev.

Sapary barysynda qaladaǵy úzdik ýnıversıtetterdi de aralap shyqty. «Nur Otan» partıasy tóraǵasynyń birinshi orynbasary Máýlen Áshimbaev, Senat tóraǵasy Baqytjan Jumaǵulov, Astana qalasynyń ákimi Baqyt Sultanov prezıdenttiń bes áleýmettik bastamasynyń júzege asyrylýy jóninde jınalys ótkizdi.

Máýlen Áshimbaev prezıdent bastamalarynyń Astanada júzege asyrylýyn joǵary baǵalady. Qala ákimi Baqyt Sultanov elorda bes áleýmettik bastamany tıimdi júzege asyrýǵa belsene kiriskenin tilge tıek etti. Sultanovtyń aıtýynsha, Elbasynyń bastamalaryn júzege asyrýda jastardyń róli aıryqsha. Bul jastardy Astana taǵdyryna aralastyrýǵa septigin tıgizedi.

Aıta keteıik, 5 naýryzda Nursultan Nazarbaev parlamentte 5 áleýmettik bastamany jarıalady. Prezıdent halyqty qoljetimdi baspanamen qamtý, salyq júktemesin azaıtý, joǵary bilim alýdyń qoljetimdiligi men sapasyn arttyrý, shaǵyn nesıe berýdi kóbeıtý jáne eldi gazben qamtamasyz etýdi usyndy. Atap aıtqanda, árbir otbasyna baspana alýdyń jańa múmkindikterin berý maqsatynda Ulttyq bank arnaıy uıym qurý arqyly jańa ıpotekalyq «7-20-25 baǵdarlamasyn» daıyndaıtyn bolady. Onyń negizgi sharty nesıe ósiminiń mólsherlemesi jylyna 7 prosentten, bastapqy jarnasy 20 prosentten aspaıtyn bolady. Nesıe merzimi – 25 jylǵa deıin.

Al jalaqysy tómen jumysshylardyń salyq júktemesin azaıtý  úshin Ulttyq ekonomıka mınıstrligine 2019 jyldyń 1 qańtarynan bastap, aı saıyn eń tómengi eseptik kórsetkishtiń 25 eselengen kóleminen az jalaqy alatyn jumyskerlerge salynatyn jeke tabys salyǵynyń mólsherin 1 prosent etý tapsyryldy. Bul rette, salyqty azaıtýdan shyǵatyn qarjynyń olardyń jalaqysyn kóbeıtýge baǵyttalýy tıis.

Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý máselesi de Elbasy nazarynda Osy oraıda, Bilim jáne ǵylymı mınıstrligine jańa ekonomıkada suranysqa ıe mamandardyń qajettiligin taldaý negizinde 2018-2021 oqý jyldaryna arnalǵan joǵary jáne joǵary bilimnen keıingi kadrlardy daıarlaýǵa memlekettik bilim berý tapsyrysyn bekitý týraly Qaýly jobasyn daıyndaý júkteldi.  Sonymen qatar joǵary bilim salasyna qosymsha 20 myń grant bólip, 2020 jyldyń sońyna deıin eń kemi 75 myń oryndyq stýdentterge jataqhana salý kózdelip otyr.

Sonymen qatar Elbasy shaǵyn jáne orta bıznes úshin nesıe kólemin 20 mıllıard teńgege arttyrý bastamasyn kóterdi.