Búgin Almaty qalasynda «Almaty Invest»  jyl saıynǵy ınvestısıalyq forýmy bolyp ótti.

Sharaǵa álemniń birqatar elinen 500-ge jýyq delegat qatysýda.  Olardyń arasynda belgili saıasatkerler, qazaqstandyq jáne sheteldik bıznes-lıderler, ınvestısıalyq korporasıalardyń, qarjy ınstıtýttarynyń jáne halyqaralyq uıymdardyń basshylary bar.

Almaty qalasynyń ákimi Baýyrjan Baıbek buǵan deıin ótken forýmdar nátıjesinde quny 1 mlrd dollar bolatyn 40-qa jýyq memorandýmǵa qol qoıylǵanyn atap ótti.  

"Shaharymyzdyń ınvestısıalyq múmkindikterin talqylaý men iskerlik qatynastar ornatýdyń dástúrli alańyna aınalǵan 6-shy halyqaralyq Almaty Invest forýmyna qosh keldińizder!

Osyǵan deıingi forýmdar aıasynda jalpy somasy 1 mıllıard dollardy quraıtyn 40-tan astam memorandýmǵa qol qoıylǵan bolatyn. Onyń ishinde qazirge deıin jalpy quny 400 mıllıon dollardy quraıtyn 12 joba iske asty.

Búgingi forým jumysyna 20 memleketten kelgen sheteldik qonaqtar qatysýda. Qonaqtardyń kópshiligi Almatyǵa alǵash ret kelip otyrǵandyqtan qalamyz týraly azyraq toqtalyp óteıin.

Almaty – shıkizattyq emes ekonomıkasy 35 mıllıard dollardy quraıtyn Ortalyq Azıadaǵy eń damyǵan megapolısterdiń biri. Alyp shahar elimizdiń jalpy ishki óniminiń besinshi bóligin jáne salyq túsiminiń tórtten birin beredi. Jalpy óńirlik ónim jan basyna shaqqanda 20 myń dollardy quraıdy.

Qalamyzǵa halyqaralyq kompanıalar ınvestısıany belsendi quıýda. 10 jylda shaharymyzǵa 22,2 mıllıard dollar ınvestısıa tartylǵan bolsa, onyń 3,5 mıllıardy sheteldik ınvestısıa. Bıylǵy jyly ınvestısıa kólemi 21%-ke, sonyń ishinde sheteldik ınvestısıalar 24%-ke artty.

Elbasynyń sarabdal saıasatynyń arqasynda táýelsizdik jyldarynda megapolıs ekonomıkasy 100 esege, halyq tabysy 21 ese artty", - dep atap ótti Almaty ákimi.

Ákimniń aıtýynsha, onyń ishinde quny 400 mln dollar bolatyn 12 joba búginde júzege asyrylǵan. 

Almaty ekonomıkasyna salynǵan sheteldik ınvestısıa kólemi bir jylda 24% ósti. Bul týraly búgin qalada ótip jatqan «Almaty Invest» jyl saıynǵy ınvestısıalyq forýmynda málim boldy.

Shahar basshy atap ótkendeı, búginde qala ekonomıkasynyń 86% saýda men qyzmet kórsetý salalaryna tıesili. Munda Qazaqstandaǵy iri kompanıalardyń úshten biri shoǵyrlanǵan.

Sondaı-aq B.Baıbek atap ótkendeı, qala jergilikti reformalardy iske asyrýda jahandyq ustanymdarǵa súıenedi jáne úzdik álemdik tájirıbelerge, sonyń ishinde BUU-nyń Turaqty damý maqsattary men Ekonomıkalyq yqpaldastyq jáne damý uıymynyń standarttaryna baǵdarlanǵan. Atap aıtqanda,  BUU Damý baǵdarlamasymen jáne «Systra» fransýzdyq kompanıasymen birlese kólik reformasy, amerıkandyq IDC kompanıasymen birlese «Smart Almaty» konsepsıasy júzege asyp keledi.

"Almaty ómir súrý men bıznes júrgizýge qolaıly qala. Búginniń ózinde qala ekonomıkasyndaǵy memlekettiń úlesi – 2,4%.

Munda 300-den astam iri salyq tóleýshi kompanıalardyń úshten biri, 30-dan astam transulttyq kompanıa, elimizdegi bankterdiń 90%-i, birlesken kásiporyndardyń 43%-i jáne iri halyqaralyq uıymdar ornalasqan. Jaqynda Birikken Ulttar Uıymynyń 14 arnaýly agenttigi úshin uıym habynyń jańa ǵımaraty ashyldy.

Almaty óz jolynda Turaqty damý maqsattaryna, Ekonomıkalyq yntymaqtastyq jáne damý uıymynyń standarttaryna jáne úzdik álemdik tájirıbelerge súıenedi. Makkenzı kompanıasymen birlese daıyndalǵan «Almaty-2020» damý baǵdarlamasy Azıa jáne Tynyq muhıty óńirine arnalǵan Ekonomıkalyq jáne áleýmettik komısıa tarapynan osy aımaqtaǵy 2016 jylǵy eń úzdik tájirıbe dep baǵalandy", - dedi Baýyrjan Baıbek.