Aqtaýlyqtar jalpyhalyqtyq dıktantqa qatysty

Búgin respýblıka boıynsha 2 mln-ǵa jýyq adam jalpyhalyqtyq dıktant jazyp jatyr. Latyn álipbıi negizinde jazylatyn dıktantqa Mańǵystaý oblysynan 80 myń adam qatysady dep josparlanǵan.

Memlekettik organdarda, mekemeler men oqý oryndarynda myńdaǵan adam respýblıkalyq sharaǵa qatysty. Aqtaýdaǵy Abaı atyndaǵy mádenı-demalys kesheninde de 150-deı memlekettik qyzmetker dıktant jazdy.

— Búgingi dıktantqa qalalyq ákimdiktiń uıymdastyrýymen 13 myńnyń ústinde adam qatysty. Olardyń qatarynda memlekettik qyzmetkerler, ustazdar, 15 jastan joǵary mektep oqýshylary, ata-analar bar. Sonymen qatar, «Qala joldary», «Kaspıı, jylý, sý arnasy», «AÝES» syndy mekeme qyzmetkerleri de óz ǵımarattarynda dıktant jazdy, — deıdi Aqtaý qalalyq mádenıet jáne tilderdi damytý bóliminiń basshysy Aldasheva Gúljazıra.

Barlyq óńirde dıktan bir mezgilde, saǵat 11:00-de bastaldy. Mátin aldymen úsh ret tyńdaldy. Al jazý barysynda ár sóılem úsh retten oqyldy. Dıktantty jazyp bolǵan soń qatesin tekserý úshin taǵy bir ret oqyldy.

Munda qalalyq ákimdiktiń memlekettik jáne ákimshilik qyzmetkerleri qatysyp otyr. Olar «Rýhanı jańǵyrý» taqyrybyndaǵy 80-90 sózden turatyn dıktantty jarty saǵat kóleminde jazyp shyqty. Qatysýshylar Arnaıy paraqshada dıktanttan bólek qatysýshylardyń aty-jóni, jas mólsheri kórsetiledi.

— Qazaqstan Respýblıkasynyń latyn álipbıine kóshýin qoldaımyn jáne ony qabyldaý bizge qıyndyq týdyryp jatqan joq. Mine, jańa ǵana ákimdik ujymy bolyp latynnegizdi álipbımen dıktant jazdyq. Mátin uzaq emes ári túsinikti. Jańa álipbıdi tez meńgerip ketemiz dep oılaımyn, — deıdi qatysýshy Ulbolsyn.

Eske salaıyq, arnaıy qurylǵan jumys toptary krıterıılerge súıene otyryp áriptik, tynys-belgi qatelerin tekseredi. Dıktant qorytyndylaryn 5 jumys kúni ishinde shyǵaryp, jarıalaıtyn bolady.