Aqtaýda halyq ártisi Aıman Musaqojaevanyń keshi ótti

Mańǵystaýǵa óner saparymen Qazaqstannyń Halyq ártisi, Eńbek Eri, Qazaq ulttyq óner ýnıversıtetiniń rektory, skrıpkashy Aıman Musaqojaeva keldi. Óner ıesi 25 adamnan quralǵan ujymmen qalyń kórermenge klasıkalyq kesh usynyp, qoshemetke bólendi. 

-«Rýhanı jańǵyrý» baǵdarlamasy aıasynda elimizdiń barlyq óńirin konserpen aralamaqpyz. Aqtóbe, Atyraý, mine Aqtaý qalasy, jalpy batys óńirlerin aralap keldik. Qazaq ulttyq óner ýnıversıtetiniń ustazdary,  stýdentteri men túlekterinen quralǵan «Solıser akademıasy» memlekettik kameralyq orkestrimen, «Tarlan» etno-ansamblimen birge konsert berip kelemiz. Olar keshte ózderi jazǵan áýenderin de oryndaıdy. Sondaı-aq búgin usynatyn shyǵarmalarymyzdyń qatarynda Vıvaldıdiń «Jyl mezgilderi», Astor Pısollanyń «Býenos-Aırestegi jyl mezgilderi», Dına Nurpeıisovanyń, Qurmanǵazynyń kúıleri bar», — deıdi óner ıesi.

Italıa, Japonıa, Polsha, Fınlándıa syndy elderde óner kórsetip, joǵary baǵaǵa ıe bolyp júrgen skrıpkashy «XX ǵasyrdyń 2000 kórnekti mýzykanty» atty dúnıejúzilik qurmetti tizimge engen.

Sondaı-aq klasıkalyq keshte kórermender «Solıser akademıasy» memlekettik orkestriniń ónerin de tamashalady. Respýblıkanyń úzdik kollektıvi, kameralyq jáne sımfonıalyq mýzyka oryndaý salasyndaǵy elimizdiń belgili mýzykalyq brendine aınalǵan ujym tanymal týyndylar men qosa qazaq kúılerin de kópke usyndy.

Halyqaralyq konkýrstardyń laýreattarynan, Qazaq ulttyq óner ýnıversıtetiniń ustazdary men stýdentterinen quralǵan ujym 20 jyl boıy túrli halyqaralyq festıválderge qatysyp, álemniń birneshe elin gastróldik týrmen aralaǵan. Olardyń qatarynda Italıa, Ispanıa, Germanıa, Túrkıa, Iordanıa, Reseı, Japonıa, Ońtústik Koreıa, AQSH t.b. elder bar. Ujymnyń dırıjeri – «Daryn» memlekettik jastar syılyǵynyń ıegeri Asqar Dúısembaev, kórkemdik jetekshisi – QR Halyq ártisi Aıman Musaqojaeva. Orkestr jaqynda Qazaqstan mádenıetin tanystyrmaq maqsatpen Italıaǵa sapar shekpek.

Halyq ártisiniń túbektegi ekinshi konserttik sapary «Rýhanı jańǵyrý» memlekettik baǵdarlamasy aıasynda uıymdastyrylǵan týrne Astana qalasy men Qazaq ulttyq óner ýnıversıtetiniń 20 jyldyǵyna oraılastyrylǵan. Alda elimizdiń ońtústik, soltústik óńirlerin aralamaq.