Olaınede (Latvıa) qazaqtyń zıatkerlik ulttyq oıyny – toǵyzqumalaqtan Qazaqstannyń Tuńǵysh Prezıdenti kúnine oraı jarys ótti. Saıysty Qazaqstannyń Lıtva jáne Latvıadaǵy elshiligi, Dúnıejúzilik toǵyzqumalaq federasıasy jáne Olaıne qalasy ákimshiligi uıymdastyrdy.

Jarysqa 20 sportshy qatysty. Sportshy S. Aqtaev myń jyldyq tarıhy bar oıynnyń qyr-syrymen tanystyryp, qatysýshylarǵa strategıa qurý men jyldam jeńiske jetý tásilderimen bólisti.

Tartysty ıntellektýaldy jáne strategıalyq saıys nátıjesinde eresekter arasynda: 1 oryn - S. Aqtaev (Qazaqstan), 2 oryn - D.Lıpına  (Latvıa), 3 oryn - D. Kozlov (Latvıa). Uldar arasynda: 1 oryn - D. Lıpın (Latvıa), 2 oryn - D. Kozlov, 3 oryn - D. Ramınısh. Qyzdar arasynda: 1 oryn - V. Chagına (Latvıa), 2 oryn - E. Chagına, 3 oryn - M.Getmanúk ıelendi.

Aldaǵy ýaqytta elshilik pen Federasıa jarysty jyl saıyn ótkizip, onyń aýqymyn keńeıtýdi josparlaýda. Latvıadaǵy toǵyzqumalaq sporty boıynsha seksıa L. Azımovanyń basshylyǵyndaǵy «Logıka» ıntellektýaldy ústel oıyndary klýbynyń bazasynda qurylǵan.

Latvıalyqtar qazaq mádenıeti keshi aýqymynda sondaı-aq Qazaqstannyń tabıǵaty týraly fotokórme men ulttyq bıdi tamashalap, qazaqy dastarhan mázirinen dám tatty. Olar Qazaqstan týraly vıktorınaǵa qatysyp, onyń aıasynda Prezıdent N. Nazarbaevtyń «Uly dalanyń jeti qyry» maqalasynyń negizgi mazmunymen tanysty. Latvıalyq mektep hory qazaqstandyq tarapqa syılyq retinde «Dýdaraı» ulttyq ánin oryndap berdi

Toǵyzqumalaq tek Qazaqstanda ǵana emes, sonymen qatar Germanıa, Chehıa, Fransıa, Shveısarıa jáne tipti Kolýmbıa sıaqty álemniń kóptegen elderinde de tanymal. Qazaqstanda toǵyzqumalaqpen eki júz myńnan astam adam shuǵyldanady. Kelesi jyly Túrkıada toǵyzqumalaqtan kezekti V álem chempıonaty ótkiziledi.