Qazaqstan Respýblıkasynyń Tuńǵysh Prezıdenti kúni qarsańynda Aqtaýda kóshi-qon qyzmetterin kórsetý ortalyǵy ashyldy, dep habarlaıdy qamshy.kz oblys ákimdiginiń baspasóz qyzmetine silteme jasap.

Saltanatty sharaǵa qatysqan oblys ákimi Eraly Toǵjanov jınalǵandardy Tuńǵysh Prezıdent kúnimen quttyqtap, ortalyq jumysyna sáttilik tiledi. Jańa ortalyqtyń jalpy kólemi 3372,7 sharshy metr, 4 qabattan turady. Kóshi-qon qyzmetterin kórsetý ortalyǵy "bir tereze" qaǵıdaty boıynsha jumys istemek.

Munda sheteldik azamattar medısınalyq tekserýden ótip, JSN ala alady, barlyq qyzmet túrlerin usyný úshin memlekettik baj salyǵyn tóleı alady, saqtandyrý polısin rásimdep, Qazaqstan Respýblıkasyndaǵy eńbek qyzmetine ruqsat alý úshin qajetti daktıloskopıalyq tirkeýden óte alady. Sondaı-aq kórsetiletin qyzmetter qataryna sheteldikterdi tirkeý, vızalyq qoldaý máselelerin sheshý, turaqty turýǵa qaldyrý jáne azamattyq alý máseleleri kiredi.

"Elbasynyń joldaýyna sáıkes, oblys ortalyqtarynda Kóshi-qon qyzmetterin kórsetý ortalyǵyn qurý qajettigi basty maqsat bolatyn. Sondyqtan oblys aýmaǵyna kelgen shetel azamattaryn tıisti tirkeýdi qamtamasyz etý jáne olardyń aımaqta bolýyn baqylaý, qyzmet kórsetý úshin qolaıly jaǵdaı jasaý úshin biz zamanaýı jabdyqtalǵan úlken zaly bar kóshi-qon qyzmeti ortalyǵyn ashtyq. Bul ortalyq memlekettik qyzmet kórsetý sapasyn jaqsartýǵa, sondaı-aq azamattardyń kútý ýaqytyn qysqartýǵa yqpal etedi»,-dedi Eraly Toǵjanov.

Budan basqa ortalyqta polısıa usynatyn barlyq memlekettik qyzmetter kórsetiledi: qarýdy tirkeý jáne saqtaýǵa ruqsat berý, gaz jabdyǵyn ornatýǵa ruqsat berý, ákimshilik aıyppuldardy tóleý jáne kúzet qyzmeti úshin lısenzıa berý.