Búginde Aqtaý qalasy boıynsha jańa shaǵynaýdandardaǵy 24 jer teliminde salynyp jatqan turǵyn úılerdiń jartysy «7-20-25» baǵdarlamasy boıynsha berilmek. Buǵan deıin baǵdarlama aıasynda ekinshi dárejeli bankterge 2 mlrd. 872 mln. teńge bolatyn 371 ótinim túsip, 235-i maquldanǵan. Bul jóninde Mańǵystaý oblysy qurylys basqarmasy bólim basshysy Imammahmýd Shaǵyrbaev málimdedi dep habarlaıdy mangystaumedia.kz.

Qazirgi tańda Mańǵystaý oblysy «7-20-25» baǵdarlamasyn iske asyrýda Almaty men Astana qalalarynan keıingi úshinshi orynda.

«7-20-25» baǵdarlamasy boıynsha 8 bank jumys isteıdi. Onyń ishinde 5 bank nesıe berip jatyr. Olar: «ATF», «Sesna», «Sentr kredıt», «RBK» jáne Halyq banki.

«Basty talaptardyń biri – klıenttiń atynda úıi jáne tólenip jatqan nesıesi bolmaýy kerek. Atyndaǵy úıin búgin satyp, ertesine baǵdarlamaǵa qatysýyna bolady», — deıdi «ATF Bank» Mańǵystaý oblystyq fılıalynyń dırektorynyń orynbasary Jasulan Sarpyqov.

Jyl sońyna deıin 1500 páter qoldanysqa beriledi dep kútilýde.

Sondaı-aq mamandar «7-20-25» baǵdarlamasyna jeke kásipkerler qatysa almaıtynyn aıtady. 21 jastan joǵary azamattar baǵdarlamaǵa qatysýǵa quqyly. Nesıe merzimi zeınetke shyǵatyn jylyna deıin (er adam 63, áıel adam 58 jas) esepteledi. Máselen, 55 jastaǵy áıel adam 3 jylǵa deıin ala alady.