«MEN QAZAQPYN» respýblıkalyq mega-jobasynyń «Dástúrli án» atalymy boıynsha bas júldesi mańǵystaýlyq ónerpaz Alpysbek Ońaıbaıulyna buıyrdy. Elordadaǵy Qazaq Ulttyq óner ýnıversıtetiniń stýdenti bıyl jobaǵa ekinshi ret qatysqan.

Jobany «Qazaqstan» teleradıo korporasıasy Aqparat jáne komýnıkasıalar mınıstrliginiń qoldaýymen ótken jyly da uıymdastyrǵan. Ol kezde «jyr-terme» atalymy boıynsha da mańǵystaýlyq Ospan Qulsymaq jeńiske jetken edi.

Mega-jobada 1500 ónerpaz baq synaǵan. Aqtyq synǵa 49 úmitker ótip, televızıalyq túsirilimge joldama alǵan. Olardyń arasynda Reseıden kelgen eki ónerpaz jáne Japonıadan kelgen bir qatysýshy bar.

Baıqaý qorytyndysynda qazylar «Úzdik dástúrli ánshi» nomınasıasy boıynsha bas júldeni ekige bóldi. Sóıtip Alpysbek Ońaıbaıuly men Raýan Álimbaev jeńisti bólip aldy. Al «Úzdik termeshi» nomınasıasymen — Kúnsulý Túrkpen, «Úzdik kúıshi» nomınasıasy boıynsha — Jánibek Jámıev marapattaldy.