QR Ulttyq akademıalyq kitaphanasynda Qazaqstannyń halyq jazýshysy, memleket jáne qoǵam qaıratkeri Ábish Kekilbaıuly atyndaǵy jańa oqý zalynyń saltanatty ashylý keshi ótti dep habarlaıdy qamshy.kz oblys ákimdiginiń baspasóz qyzmetine silteme jasap.
Oqý zalynyń qory jazýshynyń kitaphana koleksıasynan iriktelgen jeke kitaphanasynyń katalogy boıynsha ádebıetterdi usynady. Atap aıtsaq, adamzat tarıhyna arnalǵan mádenıet jáne óner tarıhy týraly basylymdar, planetanyń uly tulǵalary týraly kitaptar, Qazaqstannyń aqyndary men jazýshylarynyń kitaptary, álbomdar men atlastar, Qazaqstannyń geografıasy men tarıhy jáne onyń Shaǵyn Otany – Mańǵystaýdaǵy almanahtar men kóptegen qyzyqty basylymdar. Koleksıada barlyǵy 6019 basylym usynylyp otyr, onyń ishinde 5 883 kitap, 134 dana CD jáne DVD dıskilerindegi beınefılmder men aýdıo kitaptar jáne 2 bıblıografıalyq broshúra bar.
İs-shara barysynda Á.Kekilbaıulynyń jeke kitaphanasy qoryndaǵy qalamgerlerdiń qoltańba koleksıalarynyń jınaǵy boıynsha jaryq kórgen «Qalamger qoltańbasy» kitaby tanystyryldy.
Qazir oqyrmandardyń suranysyna baılanysty QR Ulttyq akademıalyq kitaphanasy jazýshynyń «Ańyzdyń aqyry» kitabyn fransýz jáne qytaı tilderine aýdaryp jatyr.
QR Ulttyq akademıalyq kitaphanasy bazasyndaǵy Qazaqstannyń ulttyq elektrondy kitaphanasynyń veb-portalynda jazýshymen avtorlyq kelisim-shart jasalynyp, kitaptary oqyrmandarǵa qoljetimdi bolyp otyr. Onyń birneshe kitaptary sıfrlyq formatqa ótti: «Shyńyraý», «Eleń-alań», «Qus qanaty», «Dala balladary», «Mahabbat munarasy», «Zamanmen suhbat», «Hansha darıa hıkaıasy».
50-den astam kitaptyń avtory Ábish Kekilbaev G.Mopassannyń «Per jáne Jan», «Ómir», Sh. Aıtmatovtyń «Rannıe jýravlı» romandaryn aýdarǵan. L. Tolstoıdyń «Soǵys jáne beıbitshilik» epıkalyq romanynyń aýdarmasyna qatysqan. Onyń aýdarǵan V. Shekspırdiń «Romeo men Djýletta», «Koról Lır», K. Gossıdiń «Hanshaıym Týrandot», M.Kárimniń «Aıdyń tutylý túni», M. Frıshtiń «Don Hýan nemese geometrıaǵa degen súıispenshiligi», G. Ibsenniń «Eles», A.Valehonyń «Búgin mereke» shyǵarmalary respýblıkalyq teatrlardyń repertýarynda qoıylyp júr. Bul jumystar kóp tomdyq basylymdar men jınaqtarda usynylǵan.
Atalmysh zal QR Prezıdenti N.Á.Nazarbaevtyń «Bolashaqqa baǵdar:rýhanı jańǵyrý» atty baǵdarlamalyq maqalasyn iske asyrý aıasynda QR Mádenıet jáne sport mınıstrliginiń qoldaýymen ashyldy.
