Prezıdent Nursultan Nazarbaev «Qazaqstandyqtardyń ál-aýqatynyń ósýi: tabys pen turmys sapasyn jaqsartý» atty halyqqa arnaǵan Joldaýynda «Sybaılas jemqorlyqpen belsendi kúres jalǵasatyn bolady... Jurttyń jáne bıznes qoǵamdastyǵynyń narazylyǵyn týǵyzatyn basqa da baǵyttar boıynsha tıisti retteý jumystaryn júrgizý kerek. Jalpy, 2019 jyly kórsetiletin memlekettik qyzmetterdiń 80 paıyzy, al 2020 jyly keminde 90 paıyzy elektrondy formatqa kóshirilýge tıis» dep atap kórsetkeni belgili.
Rasynda elektrondy qyzmet qoǵamdaǵy sybyılas jemqorlyqty túbirimen joıady. Munyń tıimdi jaǵy óte kóp. Barlyǵy da elektrondy qyzmet arqyly ótip, júzege asatyn bolǵan soń, adamdardyń da bılikke, jalpy atqarýshy qyzmette otyrǵandar sheneýnikterge degen senimi kúsheıedi.
Al bul oraıda Prezıdent tapsyrmasyn oryndaý úshin qandaı sharalar júzege asyrylyp jatyr? Bul oraıda elimizde «2015-2025 jyldarǵa arnalǵan Sybaılas jemqorlyqqa qarsy strategıasy» qabyldanǵan. Sondaı-aq qoǵamnyń, memlekettiń damýyna zor zalalyn tıgizip otyrǵan jemqorlyqty joıý jolynda zańdyq quqyqtyq qujattar qabyldanyp, jumys istep tur. Rasynda da, jemqorlyq degen – jegi qurt. Al muny túbirimen qurtý úshin elimizde Prezıdent tapsyrmasyna oraı búginde júıeli jumystar júrgizilip jatyr.
Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaevtyń sózine qaraǵanda, búgingi kúni elimizde kórsetiletin memlekettik qyzmettiń 78 paıyzy elektrondy formata kóshken. Prezıdent Nursultan Nazarbaev atap kórsetkendeı. aldaǵy eki jylda bul kórsetkishti 90 paıyzǵa jetkizý kózdelip otyr. Árıne jemqorlyqty joıýda elektrondy qyzmettiń jaǵymdy jaǵy kóp. Óıtkeni bul jerde «barmaq basty, kóz qysty bolmaıdy». Qazirdiń ózinde Qazaqstan jemqorlyqtyń aldyn alýda óz tájirıbesi jáne ózindik úlgisi bar memleket. BUU-nyń reıtıńisinde Qazaqstan elektrondy úkimetti damytý jaǵynan áleýetti elderdiń qatarynda turǵanyn aıtpaı ketpeýge bolmaıdy.
Bizdiń qoǵamdaǵy qazirgi kóriniske qarasaq, kóp jaǵdaıda oryn alǵan jemqorlyq áreket úshin mekemedegi nemese mınısterliktegi birinshi basshylar jaýap bermeıtin jaǵdaılar oryn alyp jatady. Sondyqtan aldaǵy ýaqytta birinshi basshynyń jaýapkershiligi mindetti túrde kúsheıtiledi. Sondyqtan da Prezıdent Nazarbaev halyqqa arnaǵan Joldaýynda aldaǵy eki jylda memlekettik qyzmettiń 90 paıyzyn elektrondy formatqa kóshirý týraly tapsyrma berip otyr. Demek, bul sybaılas jemqorlyqtyń aldyn alýdyń eń tıimdi joly ekenin uǵynýdyń mańyzy zor.
Erkin Qaldan
