Elbasynyń «Uly dalanyń jeti qyry» maqalasyn oqyp shyqqan qalyń jurtshylyq ujym bolyp, halyq bolyp talqylaýǵa kiristi. Bir sózben aıtsaq, árkim kókirek kózi, kóńil tarazysynan ótkizip, oımen eledi. Kemeńgerlikke tańdaı qaqty, keshegi tarıhty maqtan ete otyryp, bolashaqqa baǵdar jasaǵan tusta, ár oqyrmannyń sanasyndaǵy úmit taǵy bir jarq ete qalǵany sózsiz.
«Joqtan bar paıda bolmaıdy, bar joǵalmaıdy» degendi eskersek, jer kólemi jaǵynan toǵyzynshy oryndy alyp otyrǵan Qazaqstannyń ulan-baıtaǵy bireýden syıǵa kelmegeni ras. Ol bir jaǵy, aq naızanyń ushy, aq bilektiń kúshi desek, endi biri, eline, jerine degen patrıottyq pen súıispenshiliktiń, baýyrmaldyq pen eldiktiń halyqtyq tárbıesiniń jetistigi. Keshegi ótken danalarymyz ben batyrlarymyzdyń, handar men sultandarymyzdyń aýyzbirshilik pen kemeldiginiń arqasy dep túıgen jón shyǵar.
Tarıh bárine qyzyq, adamzat tarıhynan oryn alǵan ult máńgilik ekeni sózsiz. Sol tarıhqa kóz júgirtip, «Uly dalanyń jeti qyryn» saralaǵanda qazaqtyń ár ýaqytta da, ár kezeńde de ozyq mádenıetimen alda turǵandyǵynyń taǵy bir kýási bolyp otyrmyz. Ras, qý taıaq, qos ishekpen «Nar ıdirgen» nemese «toqsan aýyz sózdiń tobyqtaı túıinin túıgen» sheshendik, almas qylysh sóz ónerin qazaqtaı baǵalaı da, baǵamdaı da alǵan halyq ilýde bireý shyǵar. Bir sózben aıtý qıyn árıne, «túrki áleminiń besigi» desek te, «uly jibek joly» týraly aıtsaq ta, bolmasa, asaýdy aýyzdyqtaǵan alǵashqy «qazaq», mine munyń bári bizdiń ata-babamyzdyń júrip ótken joly. Sol sara joldyń tarıhyn zerdeleý, tarıhtaný, ony zamanaýı úlgide halyqqa jetkizý aldaǵy kúnniń ózekti jumysy ekenin Elbasy «Arhıv–2025» baǵdarlamasy arqyly júktep otyr. «Zerttemese ǵalymǵa syn, tarıhqa obal. Oqymasa, óz tarıhyn bilmese oqyrmanǵa, qazaqqa syn» degen osy.
Elbasynyń maqalasyn muǵalimder qaýymy da qyzyǵa oqyp shyqty, talasa talqylady. Taldaı otyryp keshegige kóz júgirtti. Shyndyqty kórip, ádildigin aıtty. Elbasynyń halyqshyldyǵyn taǵy bir tilge tıek ete otyryp, ár muǵalim maqalanyń mazmunynan shyǵatyn óziniń erteńgi qadamdaryn pysyqtaı otyryp, maqsattaryn aıqyndady. Óıtkeni, sáýleli shyraqty ary qaraı alyp júretin qol kerek emes pe? Ol – bala tárbıesindegi muǵalimniń isi. «Ustazy jaqsynyń ustanymy jaqsy» demekshi, muǵalimder Elbasynyń ár Joldaýyn, ár maqalasyn halyq jadyna sińirýde úlken jaýapkershilikpen qaraıdy. Sebebi, maqsat bireý, eldiń ıgiligine jumys jasaıtyn adal da jasampaz, bilimdi, óz Otanyn súıip, halqyna qyzmet atqaratyn, eńbekqor sanaly urpaqty tárbıeleý. Al osyndaı óskeleń jastyń boıyna Elbasynyń boıyndaǵy barlyq qasıetterdi sińirmeý múmkin emes.
Bolat Sataev
