Qazaqstanda turǵyndardy emhanaǵa tirkeý naýqany aıaqtaldy. 15 qyrkúıek pen 15 qarasha aralyǵynda ótken kampanıa barysynda 300 myńǵa jýyq adam medısına uıymyn erkin tańdaý quqyǵyn paıdalanǵan.
«Naýqan kezinde Túrkistan oblysy men Shymkent qalasy, Almaty qalasy, Qaraǵandy jáne Almaty oblystarynyń, sondaı-aq Astana qalasynyń turǵyndary belsendilik tanytqan. Kampanıa nátıjesi bul bastamanyń Astana, Almaty syndy iri qalalar úshin ǵana emes, aımaqtar úshin de mańyzdylyǵyn kórsetip berdi», - dedi Medısınalyq saqtandyrý qorynyń basqarýshy dırektory Zabıra Orazalıeva.
Naýqanǵa qatysqan qazaqstandyqtardyń basym bóligi emhanaǵa ózderi baryp tirkelse, 13,5 myńǵa jýyǵy onlaın qyzmetti tańdaǵan (egov.kz portaly arqyly).
Aldaǵy ýaqytta emhananyń tirkeý bólimderi arqyly tirkelý toqtatylady. Bul sheshim júıeli problemalardy joıyp, qyzmetin asyra paıdalaný jáne falsıfıkasıa faktileriniń aldyn alý maqsatynda qabyldanyp otyr.
«Buǵan eshqandaı alańdaýdyń qajeti joq. Birinshiden, tirkelý úshin emhanaǵa aıaqtaı baryp úırengen azamattar Halyqqa qyzmet kórsetý ortalyqtarynyń qyzmetine júgine alady. Atalǵan ortalyqtarda Connection Point bólimsheleri bar, olar egov portalyna qosylǵan. Sol jerde arnaıy keńesshiler otyrady. Ekinshiden, Egov.kz jýyrda Telegram botyn iske qosty. Smartfonnyń kómegimen osy bot arqyly birer mınýtta tirkelýge bolady. Úshinshiden, qazir ózińizdi ǵana emes, balalardy da onlaın rejımde tirkeýge múmkindik týdy. Júıe barlyq málimetterdi qysqa merzim ishinde, avtomatty túrde shyǵaryp beredi. Bul prosesti barynsha jeńildetedi ári artyq qujat talap etilmeıdi», - dedi Z. Orazalıeva.
MSQ Almaty fılıaly dırektory Tileýhan Ábildaevtyń aıtýynsha, tirkeýge ótinish bergen ońtústik astanalyqtardyń besten biri egov portaly arqyly tirkelgen. Bul jurtshylyqtyń engizilip otyrǵan jańa bastamalarǵa daıyndyq deńgeıi joǵary ekenin kórsetse kerek.
Bıylǵy tirkeý naýqanyna 607 medısına uıymy qatysty. Onyń 82-si – kampanıaǵa tuńǵysh ret qatysyp otyrǵandar. Atalǵan emhanalar keler jyly kepildendirilgen tegin medısınalyq kómek sheńberinde halyqqa qyzmet kórsetpek.
Jalpy, tirkeý naýqany – emhana aýystyrýdyń jalǵyz joly emes. Qazaqstandyqtardyń jylyna bir ret emhana aýystyrýǵa múmkindigi bar. Sonymen qatar, qonys aýdarǵanda, emhana jabylyp qalsa nemese MSQ-men kelisimshartty buzsa, jaqyn mańnan jańa emhana salynsa, emhana qyzmetine qatysty shyǵyndardy jabatyn erikti medısınalyq saqtandyrý kelisimshartyn bekitken jaǵdaıda basqa emhanaǵa aýysýǵa bolady. Tirkeýmen aınalysatyn emhanalardyń tolyq tizimin Medısınalyq saqtandyrý qorynyń fms.kz saıtynan tabýǵa bolady.
