Memlekettik qyzmetti elektrondy úkimet arqyly alýdyń basty artyqshylyǵy – ýaqytty qysqartýǵa jáne olardyń sapasyn arttyrýǵa, sondaı-aq sybaılas jemqorlyq qaýipin barynsha joıýǵa edáýir múmkindik beredi.
Elektrondy qyzmetter kórsetý ortalyǵy - halyqqa qyzmet kórsetetin ortalyqtardyń jańa formaty, bul jerde memlekettik qyzmetterdi kórsetý salasynyń barlyq jańashyldyqtaryn kórýge jáne sıfrlyq saýattylyqty arttyrýǵa bolady.
Elektrondyq qyzmet kórsetý ortalyǵy EXPO aýmaǵynda ornalasqan. Pavılonda memlekettik qyzmetterdi kórsetýdegi qazirgi zamanǵy tehnologıalar usynylǵan. «ELEKTRONDYQYZMETORTALYGY» «jandy» operatorlarsyz, jasandy ıntellekttiń kómegimen jumys isteıtin bolady. Vırtýaldy keńesshi Aısana qandaı da bir anyqtamalardy alý týraly aqparatty usynyp, qajetti sektorǵa baǵyt beredi. Sondaı-aq bul jerde «M-gov» mobıldi nusqasynyń múmkindikterimen tanysýǵa, uıaly baılanys operatoryn ózgertýge, nómirdi satyp alýǵa jáne de ESQ-ny SIM kartaǵa jazdyrtyp alýǵa bolady.
Sonymen qatar, qyzmet alýshylardyń kólik júrgizýshi kýáligin alar kezde kólik júrgizý boıynsha aldyn-ala emtıhannan ótý múmkindigi bolady. Ortalyq emtıhandy naqty avtokólikte tapsyrǵan kezde tekserý múmkin bolmaıtyn tótenshe jaǵdaılarda júrgizýdiń kásibı daǵdylaryna qol jetkizýge kómektesetin «digitaldrive» sımýlátorymen jabdyqtalǵan.
Ortalyqta «Video call room» bar, onyń kómegimen azamat memlekettik organdardyń birinshi basshylaryna arnalǵan beıne úndeýdi jazyp jibere alady, al olar úndeýdi qarastyryp, jaýapty 15 kún ishinde ótinish berýshilerdiń elektrondyq pochtasyna joldaýǵa mindetti. Sonymen birge, bul jerde qoǵamdyq qoljetimdilik pýnkteri ornalasqan, olardyń kómegimen azamattar elektrondyq úkimet portalynda bıometrıalyq derekter, elektrondyq sıfrlyq qoltańba nemese bir rettik qupıa sóz jáne memlekettik qyzmetterdi alýdyń derbes sektorynda aqparattyq anyqtamalardyń 44 túrin óz betinshe ala alady.
Sondaı-aq, azamattardyń sıfrlyq saýattylyǵyn arttyrý maqsatynda, ortalyqtarda bekitilgen kestege saı úıretý semınarlary ótkiziletin bolady. Yńǵaıly jaǵdaıda azamattar elektrondyq úkimet portalynyń servısterin paıdalanýdyń daǵdylaryn alyp, oqý qorytyndysy boıynsha oqytýdan ótkeni týraly sertıfıkat olardyń elektrondyq mekenjaılaryna joldanatyn bolady.
Astana, Almaty, Shymkent jáne Qostanaı qalalarynda sıfrlyq HQKO iske qosylǵan bolatyn, mundaǵy memlekettik qyzmetterdi alý tolyǵymen avtomattandyrylǵan, olar operatorlardyń qatysýynsyz júzege asyrylady. Halyqqa qyzmet kórsetý sıfrlyq ortalyqtarynyń ashylýy azamattardyń qoǵamdyq qoljetimdilik pýnkteriniń, «Connectionpoint» ózine-ózi qyzmet kórsetý sektorlarynyń jáne memlekettik korporasıanyń arnaıy pavılon qabyrǵalaryndaǵy planshetterdiń kómegimen óz betinshe elektrondyq ótinimderdi beretin memlekettik qyzmetterdi usynýdyń jańa formatyna kóshýdiń kezeńine aýysty.
Jaqyn arada qazaqstandyqtar memlekettik qyzmetterdi bettiń nemese saýsaqtyń izin skanerleý arqyly alý múmkindigine ıe bolady. Azamattar elektrondy úkimet portalynda, operator nemese halyqqa qyzmet kórsetý ortalyqtaryndaǵy qoǵamdyq qoljetimdilik pýnkteri arqyly bıometrıa boıynsha qyzmetterdi alýǵa múmkindik beretin tekserý ortalyǵy qurylmaq.
Qyzmet kórsetýlerdiń basym bóligi elektrondyq formatqa kóshirilýde. Elektrondyq formatta endi qoljetimdi qyzmetter ishindegi kópshilik qoldanatyn qyzmettiń biri – egov.kz portalynda júrgizýshi kýáligin aýystyrý bolyp tabylady. Ol kólikti onlaın tirkeý, HQKO-ǵa barmaı-aq, avtomobıldi arnaıy rásimdeý múmkindigin usynady. Portalda atalmysh qyzmetti paıdalaný úshin satýshynyń da, kólikti satyp alýshynyń da elektrondy saýasaq qoltańbasy (ESQ) bolýy tıis.
Kólikti onlaın tirkeý úshin satýshy egov.kz portalynda avtorlanýdan ótip, satylatyn kólik jaıly aqparatty engizip, aıyppuldary, salyq qaryzdary men tehnıkalyq tekseriske suranys jiberýi qajet, al olar bolǵan jaǵdaıda elektrondyq úkimettiń tólem shlúzi arqyly tólem júrgizýi tıis. Osydan keıin satyp alýshy elektrondyq portaldaǵy jeke kabınetinde ótinimmen tanysyp, aıyppuldardy teksergennen keıin, nómirlik belgi, kólik quralyn tirkeý jáne tirkeý týraly kýálik úshin memlekettik bajdy tóleýge kóshe alady. Satyp alýshy smart-mámileni óziniń ESQ-men rastaıdy jáne de oǵan tek arnaıy HQKO-ǵa baryp nómirlik belgini alý nemese ony úıge jetkizýge tapsyrys berýi ǵana qalady.
Júrgizýshi kýáligin onlaın aýystyrý kezinde egov.kz portalynda avtorlanýdan ótkennen keıin elektrondyq ótinim berip, ESQ-men qol qoıý kerek. Ótinimge sýret jáne qoltańba beınesi bar skan qosa beriledi. Odan ári jeke kabınettiń «Qyzmetterdi alý tarıhy» bólimindegi qalyptastyrylǵan elektrondyq aryzdy basyp shyǵarý qajet jáne de memlekettik bajdy tóleý týraly elektrondyq chekti basyp shyǵarýy tıis. Ony qyzmetterdi tóleý tarıhy bóliminde tabýǵa bolady.
Aıta keteıik, júrgizýshi kýáligi úshin memlekettik baj quny – 1,25 AEK bolyp tabylady.
Budan keıin turǵylyqty mekenjaıy boıynsha arnaıy HQKO-ǵa nemese jol polısıasynyń TEB-ne daıyn júrgizýshi kýáligin alý úshin ǵana barady. Basyp shyǵarylǵan aryz ben chek, aýystyrylatyn júrgizýshi kýáligi jáne jeke basty kýálandyratyn qujattary ózimen birge bolýy tıis. JK kórsetilgen merziminen keshiktirip aýystyratyn jaǵdaıda ózimen birge psıhıatrıalyq jáne narkologıalyq dıspanserden anyqtamalar, jáne de 083-nysandy medısınalyq anyqtamalar bolǵany jón.
2018 jyly shilde aıynan bastap 30 qazanǵa deıin onlaın formatta 2 453 kólik quraly tirkelgen. 10 aı ishinde 9 564 júrgizýishi kýáligin onlaın tártipte alǵan.
«Azamattarǵa arnalǵan úkimet» memlekettik korporasıa «Ulttyq aqparattyq tehnologıalar» AQ-men birge bala týý týraly qyzmetterdi de proaktıvti formatta kórsetý jóninde pılottyq jobany iske qosty. Aqparattyq júıelerdiń ıntegrasıalanýy nátıjesinde jańa azamattardyń týýyn tirkeýge berilgen ótinish avtomatty túrde túsetin bolady.
Bala týǵannan keıin onyń ata-anasynyń uıaly telefonyna náresteniń týýyn tirkeý boıynsha memlekettik qyzmetti alý týraly usynys birden kelip túsedi. Barlyq málimetterdi elektrondyq úkimet portaly ár túrli memlekettik organdardyń aqparattyq júılerinen tartady, al jetispeıtinderin – qyzmet alýshydan SMS-habarlamalar arqyly suratady. Balanyń týýyn tirkeýmen baılanysty proaktıvti qyzmetterdi kórsetý jónindegi pılottyq joba Qazaqstannyń barlyq oblystarynda áreket etedi.
Telefon arqyly tek balanyń tegin, atyn jáne ákesiniń atyn ǵana emes, týý boıynsha járdemaqyny rásimdeýge arnalǵan esepshot nómirin jáne balabaqshaǵa kezekke qoıý úshin derekterdi jiberýge bolady.
Proaktıvti formattaǵy memlekettik qyzmetterdi alý úshin mobıldi azamattar bazasynda tirkelgen bolýy mindetti bolyp tabylady. Bul úshin www.egov.kz saıtyndaǵy jeke kabınette mobıldi telefon nómirin JSN-ne baılanystyrý qajet.
Jobany iske qosqan sátten bastap 100 myń adam memlekettik qyzmetti proaktıvti rejımde alýǵa nıet bildirgen.
Mobıldi azamattar bazasynda tirkelý qazaqstandyqtar úshin zor múmkindikter ashady. Mobıldi azamattar bazasynyń paıdalanýshylaryna memlekettik qyzmetterdi proaktıvti formatta alý qoljetimdi bolyp tabylady. Olar egov.kz saıtynda ESQ-syz, bir rettik sms-qupıa sózdiń kómegimen 40-tan astam memlekettik qyzmetke qol jetkize alady. Sonymen qatar, ózine qatysty anyqtamalardy úshinshi tulǵalarǵa alý quqyǵyn bere alady. Telegramm-bot arqyly anyqtamalar alyp, qyzmetterdi paıdalana alady. Búginde Qazaqstanda 5 mln-nan astam turǵyn mobıldi azamattar bazasynda tirkelgen.
Kún saıyn portal arqyly 100 myńnan astam qyzmet kórsetiledi.
Joba iske qosylǵan sátten bastap «Ulttyq aqparattyq tehnologıalar» AQ azamattar úıden shyqpaı-aq ala alatyn qyzmetter men servıs tizimin arttyrý jónindegi jumysyn jalǵastyryp keledi. Osylaısha, usynylatyn qyzmetter men servısterdiń sany 12 jyl ishinde 235-ke deıin artqan, kompozıttik qyzmetter paıda boldy, 44-ten astam qyzmet bir rettik sms-qupıa sózdiń kómegimen qoljetimdi boldy, tólemderdiń 38 túri avtorlanýdan ótpegen qoldanýshylar úshin onlaın rejımge kóshirildi jáne de «anyqtamasyz qyzmetter» servısi eń kóp qoldanatyn anyqtamalarǵa úshinshi tulǵalardyń suratýyna ruqsat berý avtomattandyrylǵan.
Búginde « Ulttyq aqparattyq tehnologıalar» AQ-nyń eGov.kz portalynyń quramyna 150-den astam aqparattyq júıe men derekter bazasy ıntegrasıalanǵan, osynyń arqasynda paıdalanýshy birneshe vedomstvoǵa barmaı-aq, bir suratý arqyly «bir tereze» qaǵıdasy boıynsha keshendi qyzmetter kórsetýge kóshýdi júzege asyrýǵa múmkindik beredi.
Qazirgi tańda qyzmetter men servısterdiń qoljetimdiligi damyp, sonymen birge, tirkelgen qoldanýshylar sany da arta bastady.
ESQ-ny qoldanbaı-aq @EgovKzBot – Telegram messendjeri arqyly memlekettik qyzmetterdi alýǵa bolady.
EgovKzBot arqyly 15 memlekettik qyzmet pen servısti – áleýmettik mártebeni tekserý jáne negizgi zeınetaqy tóleminiń mólsheri týraly aqparatty alý, eresekter men balalardy emhanaǵa tirkeý, dárigerdiń qabyldaýyna jazylý jáne dárigerdi úıge shaqyrtý, HQKO-ǵa baratyn kezde kezekti brondaý, jumys jáne qyzmetkerler izdeý, jyljymaıtyn múlikke tirkelgen quqyqtar (aýyrtpalyqtar) týraly anyqtamany alý, mekenjaı anyqtamasy jáne t.b. alýǵa bolady.
Memlekettik qyzmetterdi telegram-bot arqyly alý úshin «Mobıldi azamattar bazasynda» tirkelý qajet. Bul óz telefon nómirińizdi eGov.kz portalyndaǵy Jeke kabınette baılanystyryp, óz gadjetińizdiń Telegram messendjerindegi botty iske qosý kerek degen sóz.
Sodan keıin aldyn ala belgilengen komandalardy jiberý jáne SMS-kody arqyly rastaý arqyly anyqtamalar men servıs aqparatyn suratýǵa jáne olardy paıdalanýshynyń elektrondyq pochtasyna qaıta jiberýge bolady.
Jaqynda «Kasa24» tólem termınaldarynda el halqynyń azamattaryna arnalǵan kópshilik paıdalanatyn memlekettik qyzmetterdiń 5-eýi qoljetimdi bolady:
- Mekenjaı anyqtamasy;
- Jyljymaıtyn múliktiń bar-joǵy týraly anqytama;
- Sottalmaǵandyǵy týraly anyqtama;
- Zeınetaqy aýdarymdary týraly anyqtama;
- Jeke tulǵanyń basqa zańdy tulǵalarǵa qatysýy týraly anyqtama.
Qoldanýshy anyqtamalardy alǵanyn bir rettik qupıa sóz (one time password) arqyly rastaıdy. Bul úshin azamat Mobıldi azamattar bazasynda tirkelgen bolýy tıis. Iaǵnı, ESQ alǵan kezde azamattar eGov.kz portalynyń jeke kabınetinde mobıldi telefon nómirin tirkeıdi, bul nómir mobıldi azamattar bazasyna engiziledi.
Sondaı-aq anyqtamalardy Kasa24 kómegimen basyp shyǵarý múmkindigi qarastyrylýda.
Búginde Qazaqstannyń memlekettik qyzmetter tizilimi 741 qyzmet kórsetýden turady. Olardyń 598-in «Azamattarǵa arnalǵan úkimet» memlekettik korporasıasy arqyly, 454-in elektrondyq úkimet portalynda alýǵa múmkindik bar.
Aǵymdaǵy jyly 9 aıdyń ishinde memlekettik korporasıa 25 mıllıonnan astam qyzmet kórsetken. Solardyń ishinde 13 mıllıonnan astamy – elektrondyq qyzmetter, al 9 mıllıonnan astam memlekettik qyzmetti azamattar front-keńselerdegi ózine-ózi qyzmet kórsetý sektory arqyly óz betinshe alǵan.
Búginde «Azamattarǵa arnalǵan úkimet» memlekettik korporasıa aldynda memlekettik qyzmetterdi elektrondyq formatqa kóshirý boıynsha tapsyrma tur. Qaraýyna Memlekettik korporasıa enetin Aqparat jáne komýnıkasıa mınıstrligi ókiletti memlekettik organdarmen birge memlekettik qyzmetterdi azamattarǵa jáne bıznes úshin kórsetý prosesterin meılinshe ońtaılandyrýdy júrgizip jatyr. Sıfrlandyrý memlekettik organdarǵa óz ónimdilikterin arttyrýǵa múmkindik beredi.
