Aqtóbe oblysynyń ákimi Berdibek Saparbaev pen Reseı Federasıasynyń Chelábi oblysynyń gýbernatory Borıs Dýbrovskıı «Qazaqstan men Reseıdegi týrızmdi damytýdyń jańa tásilderi men tendensıalary» XV halyqaralyq yntymaqtastyq forýmy barysynda memorandýmǵa qol qoıdy. Eki el basshylary qatysqan shara Petropavlda ótti.
Aqtóbe oblysynyń Reseı federasıasymen aradaǵy ishki taýaraınalymy 2018 jyldyń qańtar-tamyz aı lary ishinde 804,3 myń AQSH dollaryn, sonyń ishinde eksport – 373 myń AQSH dollaryn qurady. Eksporttyń negizgi úlesi hrom, mys jáne myrysh rýdalary men konsentrattaryna, munaı ónimderine tıesili. Sondaı-aq, eksportqa qubyr ónimi, súımen men qara metal jáne basqa da taýarlar kiredi. Aýmaǵynda «Magnıtagorsk metalýrgıa kombınaty» KAQ, «MMK-METIZ» Magnıtagorsk metbuıym-kalıbrleý zaýyty, «Chelábi myrysh zaýyty» KAQ jáne t.b. syndy iri kásiporyndar jumys jasaıtyn Chelábi oblysy aqtóbelik tarap úshin úlken qyzyǵýshylyq týdyrady. Qazirgi tańda óńirdiń kásiporyndarymen 11 aqtóbelik kompanıa tyǵyz jumys jasaıdy. Bul ózara qarym-qatynas pen ekonomıkalyq baılanysty keńeıtý úshin úlken áleýet baryn dáleldeıdi. Kelisimder aıasynda taraptar saýda-ekonomıkalyq, ǵylymı-tehnıkalyq, áleýmettik, mádenı jáne gýmanıtarlyq yntymaqtastyqty keńeıtýde ózara áreket etýge, óńirlerdiń bıznesin, óndiristik-sharýashylyq kooperasıany damytýda kómektesýge kelisti. Óńir basshylary sondaı-aq, ózderiniń ókilettikteri aıasynda birlesken baǵdarlamalar men jobalardy júzege asyrý úshin kúsh biriktirýdi, taraptar ókilderiniń resmı jáne jumys babymen kezdesýleri aıasynda ınvestısıalyq jobalardy júzege asyrýdaǵy tájirıbelerimen almasýdy, iskerlik tapsyrmalar, kórmeler uıymdastyrýdy jáne ınvestısıalyq áleýetti tanystyrýdy josparlap otyr. Densaýlyq saqtaý jáne bilim berý, týrızm salalaryndaǵy bilimderimen jáne tájirıbelerimen almasýdaǵy birlesken jumystar josparlanǵan.
