«103» qyzmetiniń 7/31 brıgadasy shuǵyl medısınalyq kómek kórsetý kezinde jedel járdem júrgizýshisine shabýyl jasaldy, dep habarlaıdy Qamshy.kz aqparat agenttigi  Almaty densaýlyq saqtaý basqarmasynyń baspasóz qyzmetine silteme jasaı otyryp.

103 nómirine qońyraý 11 jeltoqsan kúni túsken. Qyzmet brıgadasy Jetisý aýdany, Vınter kóshesindegi mekenjaıǵa barǵan. Feldsher naýqasty úıinde qarap jatqan ýaqytta júrgizýshi jedel járdem kóliginde bolǵan.

«Júrgizýshiniń sózine saı, 20:00 kezinde onyń janyna beıtanys jas jigit kelip, kólikti turaqtan alýyn suraǵan. Naýqas pen feldsherdi kútip otyrǵan jejel járdem júrgizýshisi kólikti ornynan qozǵaǵysy kelmegen. Onyń ústine basqa kólik qozǵalysyna esh kedergi keltirmegenin alǵa tartqan. Beıtanys jigit úıge kirip ketip, sálden keıin qaıta oralyp, belgisiz hımıalyq zatpen tyǵyndalǵan tapanshadan oq atady. Oq jedel járdem júrgizýshisiniń betine tıgendikten, kúıik shaldy»,-dep habarlaıdy Almaty qalalyq Densaýlyq saqtaý basqarmasy.

Kólikke qaıta oralǵan feldsher zardap shegýshige alǵashqy medısınalyq kómek kórsetken.  103 nómirine habarlasyp, qosymsha brıgada shaqyrtqan. Shabýyl jasaǵan jigit te, oqıǵa kýágeri de eshqandaı kómek kórsetpegeni belgili boldy.

Almaty qalalyq Densaýlyq saqtaý basqarmasynyń bastyǵy  Qanat Tósekbaev bolǵan oqıǵany rastady jáne mundaı jaǵdaı birinshi ret bolyp jatpaǵanyn, jedel járdem qyzmetkerlerine qala turǵyndarynyń qurmetpen qaraýyn ótinip surady.