Mektepke tájirıbeden ótýge kelgen stýdent qyzdar jabylyp júrip oqýshyny sabap tastady. Oqıǵa Pavlodar qalasyndaǵy bilim mekemeleriniń birinde bolǵan. Zardap shekken segizinshi synyp oqýshysyn bolashaq ustazdar mekteptiń ishinde soqqyǵa jyǵypty. Abyroı bolǵanda araǵa deneshynyqtyrý pániniń muǵalimi túsip, ajyratyp alǵan kórinedi. Boıjetken qyzdardyń ózderinen kishi oqýshyǵa nege sonsha óshikken? Jalpy sońǵy kezderi jasóspirimderdiń tarapynan baıqalatyn mundaı qatigezdik pen ozbyrlyqqa ne sebep? Bul týraly Eýrazıa birinshi arnasy habarlaıdy.
Segizinshi synypta oqıtyn Dará deneshynyqtyrý pánine barǵanda olarǵa tájirıbeden ótýge kelgen stýdentter sabaq beretinin biledi. Onyń sózinshe, boıjetkender oqýshylardy mazaq etip, telefondaryna beınejazba túsiripti. Sońynan kıim aýystyratyn bólmege barǵanda tórteýi Daráǵa kelip, onyń ózderine degen kózqarasy unamaǵanyn aıtyp soqtyǵa bastaıdy. Ornynan tura almaı qalǵansha taıaq jegen synyptasyn kórgender qoryqqanynan eshteńe isteı almapty.
«Bul oqıǵa týraly estip bilgende tań qaldym. Esh kinásiz meniń balamdy ermek úshin ábden soqqynyń astyna alǵan. Olardy jap-jas stýdentter dep aıaýshylyq jasaǵanyn qalamaımyn. Ádil jaza taǵaıyndalýy kerek» - deıdi zardap shegýshi Vladımır Hrapov.
Mektep oqýshysyn sabap tastaǵan qyzdardyń barlyǵy óńirdegi Inovasıalyq kolejdiń stýdentteri eken. Olardyń qolynan taıaq jegen qyzdyń ata-anasy bul oqıǵaǵa qatysty aryz jazyp, is sotqa ótken. Biraq olar stýdentterge qatysty qylmystyq istiń qozǵalmaı otyrǵanyna narazylyq bildirýde. Al mektep basshylyǵy «bul jaǵdaıdan úlken sabaq aldyq»,- deıdi.
«Oryn alǵan oqıǵa biz úshin úlken sabaq boldy. Budan keıin biz bilim mekemesimen habarlasyp, ár tálim alýshyǵa tálimger taǵaıyndaýdy jáne kúni boıy sol tálimgerdi baqylap otyrýdy qolǵa almaqpyz», - deıdi №43 mekteptiń dırektory Samal Áýbákirova.
Bolashaq pedogogtar bilim alǵan kolejdiń basshylyǵy bolsa, stýdentter jyldyń sońynda oqý ornynan shyǵarylatynyn málimdepti. Biraq bilim ordalaryndaǵy qatigezdik pen álimjettik munymen bitpeıdi. Aqtóbe oblysynda Alǵa qalasyndaǵy mektepterdiń birinde oqıtyn joǵary synyptyń eki oqýshysy tóbelesip qalǵan. Soraqysy, jasy kishisi ózinen bir synyp joǵary oqıtynyn ólimshi qyp sabap, bótelkemen basynan uryp, jaraqattaıdy. Qan-josa bolǵan qyz esinen tanyp qulap, saıabaqta jatqan jerinen jedel járdem kóligi alyp ketipti.
«Qyzym qulap bara jatyp, tóbelesti shyǵarǵan qyzǵa doǵar degenine qulaq aspaı, ura bergen. Qolyna túsken bótelkemen basynan urǵanda shytynap, qasynan qulaǵyna deıin jyryp ketken. Tyrtyqtyń izi áli bar, 10 sm. Óz-ózine áli kele almaı júr, tek dáriniń kúshimen júrmiz. Men qyzymdy aıaýsyz uryp-soqqan oqýshynyń jazalanýyn talap etemin!» - deıdi zardap shekken oqýshynyń anasy Irına Samarskaıa.
Qyzdardyń judyryqtasýyna urlanǵan syrǵa sebep bolypty. Tóbelesten birer kún buryn taıaq jep qalǵan qyz aýlada oınap júrgen 5 jasar búldirshinniń altyn syrǵasyn sheship alǵan. Ol bolǵan jaıtty kórshiniń qyzyna aıtady. Osylaısha, ol kishkentaı qyzdy renjitken tanysyn «áńgimelesý» úshin saıabaqqa shaqyrǵan eken. Al Anastasıa Zagládova bolsa, balasynyń qulaǵynan syrǵasyn sypyryp alǵany úshin oqýshy qyzdyń otbasynan moraldyq shyǵyn talap etetinin aıtty. Óıtkeni, bes jasar qyz osy oqıǵadan keıin uıyqtaı almaı, mazasyzdanatyn bolypty.
«Gop-stop deıtin ba edi mundaıdy? Baryp turǵan bassyzdyq ǵoı?! Qyzymnyń qulaǵymen qosa julyp almaǵanyna shúkir. Men moraldyq shyǵyn talap etemin, qyzyma psıhologtyń kómegi kerek» - deıdi Alǵa qalasynyń turǵyny Anastasıa Zagládova.
Mekteptegiler eki qyzdyń da oqý úlgerimi ortasha ekenin aıtyp otyr. Qazir ekeýi ınspektorlardyń baqylaýynda. Mektep dırektory qyzdardyń «túzdegi qylyǵyna» otbasyndaǵy tárbıesi de áser etetinin aıtady.
«Ata-analaryna aıyppul salý usynyldy. Bul balalardy baqylaýǵa alý usynyldy. Sol sátten bastap, kúnbe-kún sabaqtaryn úzip jatqan joq. Jalpy ekeýiniń de oqý úlgerimderi jaman emes» - deıdi Alǵa qalasynyń №4 orta mektep dırektory Ábdimurat Korgýlın.
Qazir áleýmettik jeli men vıdeohostıngterde jasóspirimderdiń osyndaı is-áreketi tolǵan beınejazbalar tolyp jur. Bir tańqalarlyǵy, onyń kóbinde názik jandylardyń bolýy oılantarlyq. Solardyń biri, mine, mynaý.
Kadrdan bir top qyzdyń qorǵansyz jandy basy-kózinen tópelep, balaǵattap jatqanyn kórýge bolady. Ashýǵa býlyqqandardyń biri tipti qolyna qaıshy alyp, onyń shashyn qıyp tastaǵan. Sodan keıin jerde jatqan zardap shegýshini aıamaı tepkileıdi. Jeli qoldanýshylarynyń jazýynsha, oqıǵa Baıqońyrda bolǵan kórinedi. Al ishki ister mınıstrligi ınternetti sharlap ketken vıdeony jiti tekserip, báriniń nyspysyn anyqtap jatqanyn habarlady.
