Grýzıanyń tuńǵysh prezıdenti Zvıad Gamsahýrdıanyń uldary Konstantın men Sotne Gamsahýrdıalar Tbılısıdegi bas prokýratýra ǵımaratynyń foıesinde ashtyq aksıasyn bastady dep jazady Qamshy.kz aqparat agenttigi Azattyqtyń deregin negizge alyp. Olar 1993 jyly jeltoqsanda qaza tapqan prezıdent Zvıad Gamsahýrdıany óltirý oqıǵasy boıynsha qylmystyq is qozǵalýyn talap etip otyr. Narazylyq aksıasy Zvıad Gamsahýrdıanyń qaza tapqanyna 25 jyl tolýyna oraılastyrylǵan.
Resmı derek boıynsha, 1991 jyly mamyrdyń 26-sy kúni Grýzıa prezıdenti bolyp saılanǵan Zvıad Gamsahýrdıa 1993 jyly jeltoqsannyń 30-ynda, azamat soǵysy aıaqtalǵannan keıin, onyń basshylyǵyndaǵy jasaq Grýzıanyń ekinshi prezıdenti Edýard Shevardnadzeniń qarýly toptarynan jeńilgen soń óz-ózine qol salǵan.
Keı derekterde jeke kúzetimen birge eldiń batysyndaǵy Hıbýla aýylyna jasyrynǵan Zvıad Gamsahýrdıanyń aýyldy grýzın arnaıy qyzmeti ókilderi qorshaýǵa alǵannan keıin ózin ózi óltirý týraly sheshimge kelgeni aıtylady.
Biraq, tuńǵysh prezıdenttiń uldary ákeleri "óz-ózine qol salǵan" degenge senbeıdi jáne qylmystyq isti "aıypty aýyrlatatyn jaǵdaıda memlekettik qaıratkerdi óltirý" baby boıynsha qaıta ózgertýdi birneshe jyldan beri talap etip keledi.
Konstantın jáne Sotne Gamsahýrdıalar eldiń tuńǵysh prezıdenti bolǵan ákelerin onyń jeke kúzetinde bolǵan bireýdiń qatysýymen grýzın arnaıy qyzmeti óltirgen, al prezıdentti óltirý týraly buıryqty Grýzıanyń sol kezdegi basshysy, burynǵy SSSR syrtqy ister mınıstri, qazirde marqum bolǵan Edýard Shevarnadze bergen dep sanaıdy.
Kózi tirisinde Shevardnadzeniń ózi jáne onyń tóńireginde bolǵandar Zvıad Gamsahýrdıany óltirý qylmysyna qatysty aıyptaýlardy úzildi-kesildi joqqa shyǵarǵan. Grýzıanyń burynǵy memlekettik qaýipsizdik qyzmetiniń basshysy, qazir Máskeýde turatyn Igor Gıorgadze 1993 jyldyń sońynda Zvıad Gamsahýrdıa jasyrynǵan aýyldy arnaıy qyzmettiń qorshaýǵa alǵanyn jasyrmaıdy. Biraq, onyń sózinshe, Gamsahýrdıany eshkim óltirmegen, ol 1992 jyly qańtarda memlekettik tóńkeris nátıjesinde bılikten taıdyrylǵannan keıin únemi ózimen birge alyp júrgen tapanshadan óz samaıyna atyp, ómirmen qoshtasqan.
Tóńkeristen keıin Zvıad Gamsahýrdıa otbasymen birge Sheshenstannyń tuńǵysh prezıdenti Djohar Dýdaevtyń qamqorlyǵymen Groznyı qalasynda turǵan. Biraq Grýzıadaǵy azamat soǵysymen bir mezgilde júrgen grýzın-abhaz soǵysy aıaqtalardan birneshe kún buryn Otanyna oralǵan.
Grýzıa bas prokýratýrasy ashtyq aksıasyna qatysty ázirshe esh komentarı bergen joq. Tergeý organynyń resmı ókili "tuńǵysh prezıdenttiń qazasy boıynsha tergeý jalǵasyp jatqanyn" ǵana aıtqan.
Pikir qaldyrý