Eki qujat ta barlaý jónindegi komıtettiń tapsyrysy boıynsha ázirlengen, buryn-sońdy jaryq kórmegen dáıekter bar dep habarlaıdy CNN. Onda Reseı AQSH-taǵy prezıdent saılaýynda Donald Tramp jeńip shyǵýy úshin iri áleýmettik jelilerdi qoldanǵany aıtylady.

Zertteý avtorlary Reseıdiń Internet zertteýleri agenttigi 2009 jyly jergilikti saılaý kezinde alǵashqy tájirıbelerin júzege asyra bastaǵanyn atap ótedi. 2013 jyly "troll fabrıkasy" atalyp ketken agenttik Twitter arqyly AQSH-tyń saıası isine aralasa bastaıdy.

Birtindep bul kampanıaǵa YouTube, Facebook jáne Instagram jelilerin de tarta bastaıdy.

2016 jyly AQSH-taǵy prezıdent kampanıasy kezinde Reseı konservatıvti saılaýshylardy mıgranttar men qarý taqybyryn alǵa tartyp, Donald Tramp qataryna tarta bastaıdy. Reseı agentteri sol kezde afroamerıkalyq saılaýshylardy shatastyrý úshin túrli habarlamalar jibergen. Atap aıtqanda, daýys berýdiń tártibi jónindegi qate nusqaýlar taratqan. Al lıberaldar, musylmandar, latynamerıkalyqtar jáne ardagerler turatyn aımaqtarǵa saılaýǵa barmańdar degen úgit júrgizgen. Osylaısha Máskeý amerıkalyq qoǵamdy jik-jikke bólmek bolǵan deıdi.

Washington Post baıandama avtorynyń biri AQSH-tyń tehnologıalyq kompanıalaryn "tez arada shara qoldanbady" dep aıyptady dep jazady. Olar bılikke Reseıdiń áreketi jónindegi aqparatty der kezinde bermedi degen.

AQSH Internet zertteýleri agenttigine qarsy qylmystyq is qozǵady. Arnaıy prokýror Robert Múller Tramptyń saılaýaldy shtaby saılaýǵa kıligý úshin Reseımen qandaı da bir kelisimge keldi me, joq pa, anyqtaýǵa tyrysyp jatyr. Tramp bolsa eshqandaı kelisim bolmaǵanyn aıtyp, bul zertteýlerdi "jalmaýyz aýlaý" dep atap keledi.