Aqtóbede QR Táýelsizdigi qarsańynda jastardyń «Jas Aqtóbe-2018» qaıyrymdylyq baly ótti. Sharaǵa eriktiler, aýyl jastary, jas kásipkerler, joǵary oqý oryndary men kolej stýdentteri qatysty.
Oblystyń úzdik jastary marapattaldy. Olar - ár salada eńbek etip jatqan azamattar. Táýelsizdik kúni qarsańynda jastar baly uıymdastyrylyp, óńirdiń kórkeıýine úles qosqandar alǵysa bólendi.
"Ásem" lagerinde ótken sharaǵa 500 ge jýyq aqtóbelik jas jınaldy. Orkestr. Boıjetkender sándi kóılek kıse, jigitterdiń ústinde kostúm. 32 jup dóńgelene váls bılep, jınalǵandardyń kóz qýanyshyna aınaldy.
Oblys ákimi B.Saparbaev 10 adamǵa árqaısysyna 100 myń teńge kóleminde aqshalaı syılyq tabystady. Olar-jas ónerpazdar, sportshylar, muǵalimder, dárigerler, eń úzdik jastar isi jónindegi komıtetter men jas kásipkerler, erligimen erekshelengen azamattar men aýdan turǵyndary da bar. Barlyǵy da maqtaýǵa laıyq.
Bal óńirdegi memlekettik jastar saıasatyna súbeli úles qosqan óskeleń urpaq ókilderin anyqtap, olardy yntalandyrý maqsatynda uıymdastyrylǵan. Oblys ákimi Berdibek Saparbaev Qazaqstanda memleket basshysy qamqorlyǵynyń arqasynda jastar saıasaty máselelerine zor kóńil bólinip jatqanyn atap ótti.
- Sizder - bizdiń táýelsiz elimizdiń bolashaǵysyzdar jáne Qazaqstandy jańa belester men jetistikterge jetkizetin de ózderińiz. Prezıdenttiń bastamasymen 2019 jyl Jastar jyly dep jarıalandy. Bizdiń oblysta óskeleń urpaq patrıotızm rýhynda, Otanǵa degen súıispenshilikke tárbıelenýi úshin barlyq jaǵdaı jasalǵan. Biz sizderdiń barlyq bastamalaryńyz ben ıdeıalaryńyzdy qoldaýǵa ázirmiz,-dedi óńir basshysy.
Qalanyń qoǵamdyq-saıası ómiri men jastar saıasatyn júzege asyrýǵa belsendi atsalysqan jastardyń qatarynda "Aqtóbe" telearnasynyń eń jas tilshisi Erlan Muqanov ta bar. Ol "Jastar" baǵdarlamasynyń avtory. Erlan úshin bul júlde úlken motıvasıa. Alǵa qoıǵan jospary kóp.
Jastar uıymdarynyń, joǵary oqý oryndarynyń jastar isteri jónindegi komıtetteriniń ókilderi alǵys hattarmen jáne kádesyılarmen marapattaldy. Dıplommen aýylǵa baǵdarlamasynyń qatysýshylary da bar. Olar týǵan aýyldarynyń kórkeıýine atsalysyp júrgender. Bireýi-týǵan jerinde balabaqsha ashsa, endi biri respýblıkalyq jáne halyqaralyq jarystarda el namysyn qorǵap júrgen talanttar.
Óńirimizdiń ár tórtinshi turǵyny - jas. Aqtóbede eńbekshi jastarǵa arnalǵan jataqhana salyndy. Jastar jáne oqýshylar saraıy paıdalanýǵa berildi. Ashyq aspan astynda dene shynyqtyrýǵa arnalǵan sport alańdary da boı kóterip jatyr. Búginde Aqtóbe sport alańdary sanynan respýblıkada 5-orynda tur. "Ásem" lageriniń esigi úzdik oqýshylar úshin aıqara ashyq. Jastyq shaqtyń múmkindigi zor,-dedi óńir basshysy.
Qaıyrymdylyq bal aıasynda 1 mln.teńge qarjy jınaldy. Bul qarajat jetim balalarǵa, múmkindigi shekteýli azamattarǵa joldanbaq. Sharaǵa Aqtóbe medısınalyq koleji men depýtattar qatysty. Jergilikti sýretshilerdiń týyndylary saýdaǵa shyǵaryldy. Satylǵan kartınalardan túsken qarjy muqtaj jandarǵa tabystalady. Oblystyq jastar saıasaty basqarmasynyń uıymdastyrýymen ótken sharaǵa 1000 ǵa jýyq aqtóbelik jas atsalysty.
Atap óteıik, 2016 jyly oblys ákimi shyǵarmashyl jáne daryndy jastardy yntalandyryp, aıtýly eńbekterin eleý maqsatynda «Jas-Aqtóbe» syılyǵyn bekitken bolatyn. Ol dástúr boıynsha jarqyn ókilderge túrli atalymdarda beriledi. Osy jyly oǵan oqýda, jumysta jáne shyǵarmashylyqta úzdik nátıjege jetken on jas ıe boldy. 100 myń teńgeniń sertıfıkatyn úzdik jyl sportshysy atanǵan Maqsat Sáýirbaev, «Jyl daryny» atalymynyń syılyǵy tabys etilgen Qymbat Qýantaeva, «Úzdik resýrstyq ortalyq» syılyǵyn ıelengen Baıǵanın resýrstyq ortalyǵy, «Úzdik jastar isi jónindegi komıtet» dep tanylǵan Aqtóbe polıtehnıkalyq kolejiniń jastar isi jónindegi komıteti aldy. Keshtiń basty oqıǵasy – M.Mámetova atyndaǵy joǵary medısınalyq kolej stýdentteriniń 32 jubynyń aǵylshyn válsin oryndaýy boldy. Sondaı-aq, shara aıasynda qaıyrymdylyq aýksıony uıymdastyrylyp, aqtóbelik sýretshilerdiń kartınalary men qolóner jumystarynyń buıymdary satyldy. Aýksıonnan túsken 1 mln teńge kólemindegi qarajat erekshe qajettilikteri bar jastar men medısınalyq kolejde oqıtyn jetim balalarǵa berildi.
