Aqtóbede Táýelsizdik kúnine oraı Aqqaǵaz Dosjanova atyndaǵy konferens-hollda densaýlyq saqtaý salasynyń qyzmetkerleri dáripteldi. Sharanyń resmı bóligin oblys ákiminiń orynbasary Marat Toqjanov ashty. Jınalǵandardy oblys basshylyǵy atynan quttyqtaǵan ol medısına jurtshylyǵynyń óńirdiń damýyna qosqan úlesin atap ótti.
* Táýelsizdik jyldary ishinde Aqtóbe oblysynyń densaýlyq saqtaý salasy úlken jetistikke qol jetkizdi. Eki jyl buryn qurylǵan medısınalyq klasterdiń arqasynda búkil Batys Qazaqstan turǵyndaryna kúrdeli joǵary tehnologıalyq aralasýlar qol jetimdi boldy. Balalardyń júregine ashyq ota jasaý, organdardy aýystyrý, býyndardy endoprotezdeý bizdiń dárigerler úshin úırenshikti jumysqa aınaldy. Medısınalyq qyzmetter kórsetýde Ońtústik Koreıa, Izraıl, AQSH jáne Reseı sıaqty álemdik kóshbasshylarmen tyǵyz yntymaqtastyq ornatyldy. Barlyq ortalyqtar ozyq jabdyqpen jabdyqtalǵan. Oblys ákimi Berdibek Saparbaevtyń tapsyrmasymen aýyldaǵy jumystar jolǵa qoıyldy. Óńirde bir jyldyń ishinde MJS aıasynda 21 aýyldyq dárigerlik ambýlatorıa salyndy. Sizderdiń adam ómirine arasha bolýdaǵy kúndelikti eńbekterińiz úshin bas ıemin,-dedi M.Toqjanov.
Saltanatty shara marapattaý rásimine jalǵasty. Aqtóbelik dárigerlerge berilgen marapattardyń ishinde «Densaýlyq saqtaý isiniń úzdigi» jáne «Densaýlyq saqtaý isine qosqan úlesi úshin» tósbelgileri, sonymen qatar, «Eńbek ardageri» medali bar. Ol marapttarǵa shırek ǵasyrdan astam eńbek ótili bar 14 medısına qyzmetkeri ıe boldy.
Alty maman Densaýlyq saqtaý mınıstrligi men Farmasevtıka komıtetiniń qurmet gramotalarymen marapattaldy. Taǵy 11 dáriger dıagnostıkaǵa zamanaýı tehnologıalar engizgeni jáne naýqastardy emdegeni úshin QR densaýlyq saqtaý mınıstrligi men Aqtóbe oblysy ákiminiń alǵys hattaryn ıelendi. Medısına sańlaqtarynyń birsypyrasy «Nur Otan» partıasynyń oblystyq fılıaly men «Senim» Medısına qyzmetkerleri kásipodaǵynyń respýblıkalyq qoǵamdyq birlestigi atynan marapattaldy.
Kópten kútken sát – páter kiltterin tabystaý sharasy boldy. Endokrınolog Móldir Tomarova, balalar hırýrgi Asqat Batyrov pen anestezıolog Nurmuhambet Bıgıev syndy jas mamandar baspanaly boldy.
* Dıplomymdy alǵan soń eńbek jolymdy Aqtóbe medısınalyq ortalyǵynda terapevt bolyp bastadym. Sonymen qatar, rezıdentýrada tar sheńberli biliktilik aldym. Endokrınologıalyq bólimde jumys istep jatqanyma eki jyl boldy. Bizderge munda naýqastardy emdeý úshin barlyq jaǵdaı jasalǵan. Páter alam dep oılamappyn da. Oblys basshylyǵyna mereke qarsańynda jasaǵan syıy úshin rahmet! Týystarym men áriptesterim tańerteńnen beri habarlasyp, quttyqtap jatyr. Bul meniń ómirimdegi eń tolqynysty kún boldy, - dedi Móldir Tomarova.
Shara merekelik konsertpen aıaqtaldy.
