Aqtóbelik jas sýretshiniń týyndylary talaıdy tańqaldyrdy. Avtordyń kartınalaryn alǵash kórgender naǵyz kásibı mamannyń qylqalamynan týǵan dep oılap qalýy ábden múmkin. Alaıda, 24 jastaǵy Vasılıı Morozovtyń sýretshilikke den qoıǵanyna bir jylǵa da tolmaǵan. Jas jigit on saýsaǵynan aırylǵanyna qaramastan, kánigi sýretshilermen ıyq tirese eńbek etip, úlken jobalardyń basy-qasynda júr. Bul týraly Eýrazıa birinshi arnasy habarlaıdy.  

2016 jyldyń qańtary Vasılııdiń ómirin túbegeıli ózgertti. Kolejdi támamdap, elektro-mehanık bolyp jumys istep júrgen jigit qaıǵyly jaǵdaıǵa ushyrap, eki qolyn qatty úsip qalǵan. Aqtóbe, keıin Reseıdiń dárigerleri ota jasap, 22 jastaǵy jalyndap turǵan jigittiń qolyn kespeske amal joq ekendigin aıtady. Pyshaqqa túskennen keıin biraz qınalady. Sol kezde dárigerler qoldy qımyldatyp, kóbirek jattyǵý jasaýǵa keńes beripti. Vasılıı dereý qolyna qaryndashty alǵanyn aıtady. 

«Bir jyl boıy aýrýhana jaǵalap júrdim. Dárigerler qolyń jaqsy jumys istesin deseń, jattyǵý jasa dedi. Buryn-sońdy sýret salýǵa tipti ebim bolǵan joq. Osy jaǵdaıǵa tap bolǵannan keıin, qaryndash ustap kórdim. Birte-birte beıneleýge qyzyǵýshylyǵym artty. Osy stýdıaǵa byltyr qańtarda keldim. Qaryndashty ustaýdan basqa túk bilmeıtinmin. Osy jerde akrılmen, túrli-tústi boıaýmen jumys isteýdi úıretti», - deıdi sýretshi Vasılıı Morozov.

Vasılıı bir jyldyń ishinde ábden tóselgen. Qaryndash, qylqalammen grafıkadan bastap, portret, peızaj, kez kelgen janrda kartınany beıneleı alady. Eń bastysy  tabandylyq. Eger kásibińdi súıseń, talpynsań, alynbaıtyn qamal joq. Jas jigittiń ómirlik ustanymyn dostary da quptaıdy. 

«Vasılıı  jaqsy sýretshi. Biz ony jobaǵa shaqyrdyq.Ol sondaı meıirimdi adam.Biz onymen tanysqanymyzǵa, kezdeskenimizge qýanyshtymyz» - deıdi V.Morozovtyń dosy, áriptesi Áıgerim Maǵjanova.

Áriptes dosy Áıgerimniń aıtqan jobasy  «Óner sıtı». Iaǵnı, Vasılıı Morozov dostarymen birge áleýmettik jobany júzege asyryp otyr. Olar ózderiniń dızaınerlik sheberhanasynda jarymjan balalarǵa arnalǵan arnaıy sensorlyq oıynshyqtar ázirleıdi. Bul balanyń motorıkasyn damytýǵa kómektesedi eken. Oıynshyqtardy keskindeý, pishinin oılap tabý Vasılııge júktelgen. Jas jigit munymen shektelip qalmaq emes. Alda jeke kórmesin ótkizip, shyǵarmashylyǵyn shyńdaýdy josparlap otyr.