Aqtóbe oblysynda QR Táýelsizdigi kúnine oraı Qarǵaly aýdanynyń Badamsha aýylynda «Nurly jer» baǵdarlamasymen salynǵan alpys páterli jańa bes qabatty turǵyn úı paıdalanýǵa berildi.
Memlekettik turǵyn úı qorynan baspana alýǵa kezekte turǵan jetim balalar men áleýmettik jaǵynan áljýaz toptaǵy otbasylar, búdjet salasynyń qyzmetkerleri qonys toıyn toılady.
Aýyl turǵyndaryn kópten kútken jańalyqtarymen oblys ákimi Berdibek Saparbaev quttyqtady.
* Elbasy saıasaty árqashan eń aldymen halyqtyń ál-aýqatyn kóterýge, sonyń ishinde árbir qazaqstandyqty baspanamen qamtamasyz etýge baǵyttalǵanyn bilesizder. Sonyń arqasynda Aqtóbe oblysynda tek oblys ortalyǵynda ǵana emes, oblys aýdandarynda da úıler salynyp jatyr. Tek osy jyldyń qorytyndysy boıynsha oblysta kem degende 900 m2 turǵyn úı salynady jáne halyqty sapaly qol jetimdi baspanamen qamtý jumysy jalǵasady,- dedi óńir basshysy quttyqtaý sózinde.
Turǵyn úıdiń qurylysyna 430 mln teńge bólingen. Jańa qurylystyń aýlasy da tolyqtaı abattandyrylǵan – oıyn, sporttyq, fýtbol oınaıtyn alańdar ornatylǵan.
* Prezıdentimizdiń saıasaty arqasynda óz páterlerimizdiń kiltin alyp jatyrmyz. Qýanyp turmyn. Men eki balanyń anasymyn, uzaq ýaqyt boıy «tolyq emes otbasy» retinde úı kezeginde turdym. Búgin bizdiń armanymyz oryndaldy,-dedi jýrnalısermen áńgimesinde jańa úıden páterli bolǵan Badamsha turǵyny Evgenıa Komınskaıa.
Sol kúni Badamshada sondaı-aq, merekelik aýyl sharýashylyǵy jármeńkesi ótip, oǵan oblys ákimi de bardy. Óńir basshysy usynylǵan ónimderge baǵasyn berip, taýar óndirýshilermen áńgimelesti de olardy jańa tehnologıalar men aýyl sharýashylyǵynyń dástúrli emes túrlerin ıgerýge, memlekettik qoldaý sharalaryn paıdalanýǵa shaqyrdy. Jármeńke kezinde qarǵalylyqtar bal, kókónis, arpa, sút pen et ónimderin, kondıter buıymdaryn, sheker men t.b. tómen baǵamen satyp aldy.
Sondaı-aq, oblys ákimi Berdibek Saparbaev Qos-Estek aýylynda bolyp, ortalyq sýmen qamtý júıesiniń iske qosý rásimine qatysty. Atalmysh eldi mekendi sýmen qamtamasyz etý úshin 41 shaqyrym qubyr júrgizýge, kólemi 400 tekshe metrlik eki rezervýar men kólemi 50 tekshe metr bolatyn sý jınaıtyn munara salý qajet boldy.
* Memleket basshysynyń halyqtyń ál-aýqatyn kóterý týraly tapsyrmasy aıasynda bıyl bizdiń oblystaǵy aýyldardyń kóbisi ortalyqtandyrylǵan sýmen qamtý júıesimen qamtamasyz etildi.
Nátıjesinde, oblys ortalyqtandyrylǵan aýyz sýmen 93% qamtyldy. Biz aýdan turǵyndaryn Táýelsizdik kúnimen jáne mańyzdy áleýmettik nysandardyń ashylýymen quttyqtaý úshin arnaıy keldik, - dedi aýyl turǵyndarymen áńgimelesken Berdibek Saparbaev.
Ol sondaı-aq, aýyl turǵyndaryn kásipkerlikpen, atap aıtqanda, aýyldyń iri respýblıkalyq tas jolda ornalasqanyn eskere otyryp, jol boıynda qyzmet kórsetýmen aınalysýǵa, memlekettik baǵdarlamalar aıasynda qoldaý quraldaryn qoldana otyra aýyl sharýashylyǵyn belsendi damytýǵa shaqyrdy.
