Táýelsizdik kúnine oraı Qobda aýdanynyń turǵyndaryna sý qubyry, páterler men taǵy basqa áleýmettik nysandar tartý etildi.
Aqtóbe oblysynyń ákimi Berdibek Saparbaev jumys babymen Qobda aýdanynda bolyp, aýyldardyń damýymen, jańa áleýmettik nysandardyń qurylysymen tanysty jáne qobdalyqtardy QR Táýelsizdigi kúnimen quttyqtady.
Berdibek Saparbaev ertemen Taldysaı aýylyna kelip, ortalyq sýmen jabdyqtaý júıesiniń iske qosylý saltanatyna qatysty. Bul maqsatqa memleket 300 mln teńgeden astam qarajat bólgen. Jańa sý qubyrynyń jalpy uzyndyǵy 16,7 shaqyrym. Ol iske qosylysymen aýdan halqynyń ortalyqtandyrylǵan sýmen qamtylýy 74%-ǵa jetti.
Aıta keteıik, sapaly aýyz sýmen qamtý – bul taldysaılyqtardyń oblys ákimi aýylǵa kelgen kezde júgingen alty problemalyq suraqtarynyń biri bolatyn. Aýyl turǵyndary sý qubyrynan bólek, dárigerlik ambýlatorıa men aýyl ákimdigin ashýdy, klýb pen aýylǵa kire beris joldy kúrdeli jóndeýdi, gazben qamtamasyz etýdi ótingen-tin. Búginde taldysaılyqtardyń joǵaryda aıtylǵan máseleleriniń barlyǵy da sheshildi.
- Elbasynyń áleýmettik saıasaty árqashan aýyl turǵyndaryn búkil ıgilikpen qamtamasyz etýge baǵyttalyp otyrdy. Suraǵandaryńyzdyń barlyǵy oryndaldy. Endigi mindet sizderde – óz otbastaryńyzdyń, týǵan aýyldaryńyzdyń ıgiligine jumys isteńizder. Kishkentaıdan bastańyzdar – aýladaǵy, úıge jaqyn mańdaǵy joldardy túzeńizder. Taldysaıdyń damý keleshegi – zor, óıtkeni gaz, sý, jaryq bar, aýyl respýblıkalyq mańyzy bar kólik jolynyń qasynda ornalasqan, Aqtóbege jaqyn. Jol boıyndaǵy qyzmet kórsetýdi damytyńyzdar, qalany aýyl sharýashylyǵy ónimderimen qamtamasyz etińizder. Bastysy – qol qýsyryp otyrmaý kerek, sonda ǵana bári bolady. Búgin men sizderdi sý qubyrynyń iske qosylýymen, eń bastysy – elimizdiń Táýelsizdigi kúnimen quttyqtaımyn,-dedi Berdibek Saparbaev.
Taldysaılyqtar memlekettiń kóńil bólip, qamqorlyq kórsetkeni úshin alǵystaryn bildirdi.
- Aýylda turatyndardy umytpaǵanyńyzǵa, bizdi ózińiz kelip quttyqtaǵanyńyz úshin alǵys aıtqymyz keledi. Bizdiń aýyl – qutty jáne osynyń bári memlekettiń arqasynda. Rahmet,- dedi aýyl turǵyndary atynan sóılegen Altynbekuly Saǵyn aqsaqal.
Jumys sapary aýdan ortalyǵy – Qobda aýylynda jalǵasty. Munda jańa 16 páterdiń kilti jetim jáne ata-ana qamqorynsyz qalǵan balalarǵa, az qamtylǵan otbasylarǵa, búdjet salasynyń qyzmetkerlerine berildi. Eki segiz páterli úıdiń qurylysyna búdjetten 120 mln teńge bólingen.
Oblys ákimi quttyqtaý sózinde: «Elbasynyń halyqtyń ál-aýqatyn kóterý týraly tapsyrmasyn oryndaı otyra biz turǵyn úılerdi tek Aqtóbede ǵana emes, oblys aýdandarynda da salyp jatyrmyz. Jyl basynan beri oblysta 770 myń sharshy metr baspana paıdalanýǵa berildi, jyl qorytyndysy boıynsha kem degende 900 myń sharshy metr turǵyn úı paıdalanýǵa beriledi dep josparlanyp otyr. Aqtóbelikterdi sapaly turǵyn úımen qamtamasyz etý jumysy jalǵasatyn bolady»,-dep atap ótti.
Keıin óńir basshysy uzyndyǵy 235 metrlik jańa densaýlyq aleıasyn qarap shyqty. Munda jaıaý qydyryp, belsendi fızıkalyq demalys úshin barlyq jaǵdaı jasalǵan. Jaıaý júrginshiler joly abattandyrylyp, shaǵyn sáýlettik pishinder ornatylǵan, eki júzge jýyq aǵash otyrǵyzylǵan.
Qobdadaǵy jańa dene shynyqtyrý-saýyqtyrý kesheninde «Uly dalanyń jalyndy jastary» jastar sleti ótti. Shara aıasynda óńir basshysy balalar úıiniń eki tárbıelenýshisine páter kiltterin tabys etip, aýdandaǵy qoǵamdyq ómirge anaǵurlym belsendi aralasatyn segiz jasty marapattady, jańa óner ortalyǵyna elektrondy fortopıano satyp alý úshin sertıfıkat berdi.
Jumys sapary Jırenqopa aýylynda aıaqtaldy, ol jaqta oblys ákimi jergilikti kásipkerlerdiń «Týǵan jerge taǵzym» aksıasy aıasynda salǵan eki nysanmen tanysty. Atap aıtqanda, óńir basshysy quny 5 mln teńge bolatyn sport alańyn qarap shyǵyp, Qazaqstandaǵy qasıetti oryndar tizimine engizilgen Aqtóbe oblysynyń tórt ýchaskesiniń biri - Qobylandy batyr memorıaldy kesheni janyndaǵy qonaqtar keletin ortalyqtyń ashylýyna qatysty. 12 oryndyq qonaqtar keletin ortalyqtyń qurylysyna 35 mln teńge bólingen. Oblys ákimi ortalyq ashylsa óńirdegi týrızmniń damýyna yqpal etetinine senim bildirdi.
