QR Táýelsizdigi qarsańynda Aqtóbede qoǵam jáne saıası qaıratker, Qazaqstan halyq jazýshysy Ábish Kekilbaevtyń esimi berilgen jańa mektep ashyldy. Bul batys óńirindegi zamanaýı aqparattyq tehnologıalardy tereń oqytatyn alǵashqy mektep-lıseı.
Saltanatty sharaǵa Aqtóbe oblysynyń ákimi Berdibek Saparbaev, Ábish Kekilbaevtyń jubaıy men uly – Klara Jumabaeva men Dáýlet Kekilbaev, qoǵam ókilderi qatysty.
* Ábish Kekilbaev Qazaqstannyń zamanaýı mádenıetinde erekshe oryn alady. Onyń uly shyǵarmalary álemniń ondaǵan tiline aýdaryldy. Ol jazýshy ǵana emes, memlekettiń qalyptasýy men nyǵaıýyna, halyqtyń birligin damytý úshin kóp nárse jasaǵan daryndy saıası qaıratker. Maǵan onymen tanys bolý jáne kóp jyldar boıy birge jumys isteý baqyty buıyrdy. Ol – júregi keń jan. Onyń murasyn óskeleń urpaqqa tabys etý – paryzymyz. Balalar osyndaı uly adamdardy úlgi tutyp, ómir súrýdi úırenýleri kerek. Sondyqtan da jańa mektep Ábish Kekilbaevtyń qurmetine, onyń esimimen ataldy,-dedi oblys ákimi quttyqtaý sózinde.
900 oqýshyǵa arnalǵan №72 İT-mektep-lıseı Avıator shaǵyn aýdanynda ornalasqan. Onyń qurylysyna, abattanýy men jaraqtanýyna shamamen 1,6 mlrd teńge bólindi. Mektepte qyryq oqý kabıneti jumys jasaıtyn bolady, sonyń ishinde ınformatıka, fızıka, hımıa jáne bıologıa, aǵylshyn tili pánderiniń jabydqtalǵan kabınetteri, kitaphana, medıateka bar. 1-7 synyp oqýshylary aqparattyq tehnologıa negizderin úırenedi, 7 synyptan bastap arnaıy baǵdarlamalaý tiliniń kýrstary oqý josparyna engiziledi. Sondaı-aq, robot tehnıkasy men 3D-prıntıngti tereń oqytý jaǵy qaraldy.
Mekteptiń saltanatty ashylý rásimi oqý ǵımaratynyń qasbetinde Ábish Kekilbaevtyń qurmetine ornatylǵan memorıaldy taqtaǵa gúl shoqtaryn qoıýmen aıaqtaldy.
* Aqtóbelikterge eske alǵandary úshin alǵys aıtamyn. Ábish 77 jasynda ómirden ótti, biraq artynan úlken iz qaldyrdy. Onyń basty tilegi árqashan bir nárse boldy – óz eliniń baı, beıbit ári gúldengenin kórý. Búginde biz sondaı ýaqytta ómir súrip jatyrmyz. Balalar, osy syıdy baǵalaı bilińizder. Úlkenderdiń sizder úshin jasaǵandaryn baǵalaı bilińizder, osyndaı ıgi isterdi jalǵastyryp, arttyrýǵa umtylyńyzdar,-dedi Ábish Kekilbaevtyń jubaıy Klara Jumabaeva.
Ábish Kekilbaev – qoǵam jáne saıası qaıratker, Eńbek eri jáne Qazaqstannyń halyq jazýshysy. Ol QR birinshi hatshysy, Prezıdenttiń keńesshisi boldy. Qazaqstan táýelsizdigi qarsańynda Ábish Kekilbaev qazaq tiline, onomastıkaǵa, ulttyq tarıhqa, áleýmettik-mádenı máselelerge jáne halyqaralyq qatynastarǵa baılanysty máselelerdi sheshýge belsene at salysty.
